Segun Parlamentario Yrausquin:
“Aunke nan no tin e curashi di reconoce otro”
ORANJESTAD (AAN) – Lider interino di fraccion di AVP, Parlamentario Juan David Yrausquin, den conferencia semanal di prensa a toca e tema di e fondonan di APFA cu tanto atencion ta captando e dianan aki tanto di gobierno, como di gremionan sindical y fraccionnan di oposicion.
E parlamentario a sorprende kizas su mes coleganan, e lo a sorprende gobierno y sin duda a sosode cu prensa riba loke el a declara y esaki ta cu tanto gobierno anterior como gobierno actual a tuma paso pa salvaguardia e fondo, pero berdad ta cu ningun di e dos partidonan aki ta reconoce kico otro ta haci.
El a duna reconocimento na gobierno di MEP cu a tuma e prome pasonan y na gobierno cu su fraccion ta sostene di a duna continuidad na locual MEP a bin cune.
Yrausquin a señala cu esaki ta un tema hopi complica, y hasta expertonan riba e materia aki tin dificultad pa splica na un manera simple e tema di e fondonan di pension di empleadonan publico, y pa motibo di e complehidad di e tema e ta habri espacio pa worde mal interpreta pa cierto motibonan politico.
“ Awe, mi ta bay haci algo un poco inusual den sentido di nos politica aki na Aruba. Loke mi kier haci ta duna un gratitud na dos partido politico y dos gabinete. E prome gabinete cu mi kier reconoce awe den e tema aki di APFA ta e gobierno Oduber. Hopi biaha gabinetenan ta bin haci algo y esun cu bin ta haci algo completamente diferente, y den e caso di APFA ta un caso tipico unda cu dos gabinete eigenlijk a traha hunto pero no tin e curashi di reconoce otro. Mi ta kere cu di parti di MEP e no kier reconoce AVP pa locual e ta bin ta haci e ultimo dos pa tres añanan riba e tema di APFA, y mi ta kere cu kizas gabinete Mike Eman 1, te awor no kier a reconoce tampoco e esfuerzonan cu gobierno Oduber a haci riba e asunto aki”, Yrausquin a remarca.
Yrausquin a menciona cu e ehemplo cu e tin pa duna ta e leynan cu a worde traha riba e fondonan di APFA. El a papia di un ley cu a keda cla y a worde publica dia 28 di April 2005, door di e minister di husticia e tempo ey, na unda el a introduci un reglamento nobo pa tur e ambtenaarnan nobo, kiermen cu a drenta den servicio di gobierno for di 2005 padilanti. Esaki ta un areglo unda cu e persona ta baha cu pension na su 60 aña y cu tin un franchise den dje, y ta tene cuenta cu e futuro pensionado aki tin un AOW como entrada, y esaki ta un parti importante di un areglo di pension moderno.
Tambe e average di entrada cu ambtenaar a ricibi durante e temporada cu el a traha, ta bira e base riba cual e ta haya e pension.
E mesun ley aki a crea tambe e posibilidad pa despues di un Dialogo Social cu a tuma lugar na 2009 y 2010 a structura e mesun reglamento aki pa tur empleado publico. Pues, no tabata necesario pa Gabinete Eman 1 traha un ley nobo, pasobra esaki tabata traha caba y unico aspecto necesario tabata traha un Landsbesluit, pa asina efectua e cambionan cu a worde prepara caba na 2005.
E Parlamentario a bisa cu kizas no tin hopi ehemplo unda cu un gabinete ta cuminza algo y e siguiente cu bin ta termine, pero den e caso aki e ta uno palpable di un situacion unda cu gabinetenan a traha hunto.
Un elogio mereci pa Parlamentario Juan David Irausquin pa e tin e grandures y e curashi pa duna
reconocimiento na hechonan di un partido den gobernacion anterior.Asina ta duna un ejempel importante esta cu politiconan mester stop di mira atras y semper bai expresa solamente criticanan negativo cu no ta hiba nos nada padilanti.Mester crea mas union politico pa asina junto jega na un solucion positivo constructivo na bienester di nos Communidad