Na apertura di e di 26 Aruba Hi-Winds
ORANJESTAD (AAN): “Aruba Hi-Winds a nace na Aruba, e ta pertenece na Aruba y Aruba ta su luga”, asina Minister di Salubridad y Deporte, dr. Richard Visser a bisa cu entusiasmo na apertura di e di 26 Aruba Hi-Winds. El a enfatisa cu Aruba Hi-Winds ta hancra den e historia di nos isla.
“Hi-Winds ta masha special pa Aruba y e mester sigui y sigui y sigui…Y nos mester reconoce cu Hi-Winds a defini un era nobo den turismo di Aruba”, Minister Richard Visser a subraya. “E evento aki ta mucho mas grandi cu solamente windsurfing y kite boarding”, el a añadi.Un aficionado di windsurfing y como un di e prome windsurfernan na Aruba, Minister Dr. Richard Visser for di cuminsamento di Hi-Winds a experencia e evento aki cu a haci Aruba su beachnan bunita y condicionnan ideal pa windsurf conoci y reconoci rond mundo.
E cobertura den prensa cu Aruba a conoce tabata sin igual y no tabata reserva solamente na cobertura den medionan specialisa den windsurfing y deporte en general, pero hasta revistanan manera Marie Claire y Seventeen magazine a publica articulonan grandi relaciona na e desaroyo di e deporte aki na nos isla. Hendenan di tur edad tabata biaha pa Aruba pa sea siña windsurf of bin midi nan forsa cu e biento fuerte y entre otro e caminda di Malmok a conoce diferente centronan di windsurf local y di companianan internacional, algun hasta cu nan mes apartamentonan pa acomoda e turista cu ta biaha cu su ekipo personal. Esaki di berdad tabata un era nobo den turismo pa Aruba, cu oportunidadnan unico.
Minister Visser a comenta cu e tabata contento di wak tanto amigonan di e tempo ey cu awo a siña of ta siñando nan yiunan tambe con pa windsurf. Asina e deporte ta sigui y crece atrobe.
E mandatario a conclui deseando tur hende un evento dibertido y hopi exito. “Haci di e Aruba Hi-Winds aki un happening hopi hopi grandi!” el a expresa.
