ORANJESTAD (AAN): Joanne Lopes, e Queen Arubiano di 22 aña di Zomercarnaval 2012 a worde ricibi na Cas di Aruba den un esfera di alegria y hubilo, pero di repente lagrimanan a cuminsa cay. Tabata e palabranan sentimental di Minister Plenipotenciario Edwin Abath cu a pone Joanne Lopes yora di emocion.
Abath a bisa cu e forma orguyoso con e ta expone su raiznan ta un ehempel pa tur Arubiano. Ora cu e pin di Aruba a worde poni riba su bisti, Joanne no por a contene su lagrimanan mas.
Minister Plenipotenciario tambe a emociona. Loke cu e hoben Arubiano multitalentoso aki a logra ta grandi: Den e 28 aña di existencia di Zomercarnaval nunca antes prensa Hulandes a dedica asina tanto atencion na e Reina. “Henter Aruba ta orguyoso di bo. No ta facil na Hulanda pa logra haya headlines positivo, pero abo si a logra den esaki. Esaki ta bon pa bo, pa Zomercarnaval y sigur pa Aruba” Abath a remarca.
Ilustrativo tabata tambe e palabranan di director Europa Tirso Tromp di e organizacion turistico ATA: “Loke Joanne a haya na atencion di pensa den un par di dia, ta tuma nos lunanan pa haya”. Stichting Zomercarnaval tambe ta masha feliz cu e escogencia di e hurado, asina presidente suplente Calvin Coreon a bisa.
E hurado profesional tabata msha impresiona cu e show presenta pa Joanne cu a laga tur otro candidato leu su tras, asina Gré Ploeg, kende semper ta compaña e candidatanan a splica.”Aki bunitesa so no ta hunga un rol, pero sigur tambe e carisma y tambe ta wak si e candidata tin Carnaval den su sanger. “E ultimo aki ta e caso”, e Queen mes a afirma. “Mi a lanta cu Carnaval. Mi ta Carnaval”. Rossini van Wijk, e motor tras di e grupo di Carnaval ‘Kingdoms Under The Sun’, a yama su pupil charmant y talentoso. “Joanne ta un inspiracion completo. E no ta un Reina, pero un Emperatriz”.
President Henry van der Kroon di e Federation of European Carnival Cities (FECC) a conta cu el a traha cu Joanne durante un bishita di trabao na Slovenia y cu eynan tur atencion a bay den direccion di e beyesa Arubiano. “Tabata sneeuw, asina ta cu naturalmente el a hala atencion.” FECC-ambassadrice Marcia Stamper a bisa di tin un experiencia igual tempo cu Joanne na 2008 a worde eligi como Miss Rio aan de Rijn. “El a haya tur atencion”. E mama di e Reina mes a keda trankil y modesto scuchando tur e palabranan di elogio den direccion di su yiu. “Mi ta un mama orguyoso”. E di 28 celebracion di Zomercarnaval ta cuminsa diabierna anochi cu e final di Battle of Drums.
Pa mei anochi Queen Joanne ta haci e apertura oficial di e Carnaval mas grandi di Europa. E parada cu for di 1’or di atardi ta pasa den cayanan di centro di Rotterdam ta spera di atrae 900 mil hende. Nan por admira un Carnaval consistiendo di 38 grupo cu un total di 2 mil participante den trahenan colorido.
Zomercarnaval manera cu e ta den su forma actual a cuminsa na 1984. Organiza door di Arubiano y Antiyanonan cu tabata haya falta di nan Carnaval.
