Evelyn y Schotte
Ta dificil pa bisa awo caba cu e politico Schotte di Curaçao ta culpabel di crimennan serio manera ta worde bisa pasobra na su cas y oficinanan fiscal y polis a tene “huiszoeking” buscando pruebanan di su culpabilidad. En todo caso ta un hecho si cu Evelyn Wever Croes ta amigo intimo di Schotte y a mustra esaki hopi cla ora e a bay vota hunto cu e amigo aki dia di eleccion. Schotte tabata na Aruba pa compaña su amiga den campaña y Evelyn a mustra e dianan ey cu e ta sumamente contento cu e aprecio cu e a haya di Schotte.
Awe mester pone e caso aki banda di e ofensanan cu Evelyn a bin cune cu Mike Eman lo ta amigo di un gobernador Colombiano cu a bin oficialmente Aruba hunto cu un cantidad di otronan for di tur parti di mundo pa asisiti na un congreso oficial di Aruba. Scupi na laira ta bin back den bo cara awe ta conta un biaha mas pa Evelyn. Schotte simplemente a bin Aruba como amigo intimo di Evelyn manera e mes a splica.
Schotte a bin un paar di dia pa pasa cu Evelyn pa campaña pe y compañe durante e dianan pisa cu Evelyn tabata pasa aden. Ta di spera cu esnan rond di Evelyn por splike cu aki por mira e diferencia di hende drechi y hende cu un mentalidad troci, sushi y maligno. Pasobra den caso di Evelyn si tin laso intimo di amistad cu un hende cu seriamente ta bao di investigacion di autoridadnan hudicial. Nos no sa si Evelyn ta bay baha como lider manera gran parti di su partido ta desea. E daño cu e ta haci partido tur dia mas y mas casi no por worde drecha mas. E a bira lider na e manera di mas sushi cu politica a yega di conoce na Aruba. Lanza un cantidad di mentira tras di otro.
Ofende nos Cas Real na un manera grocero. Keda sostene hortamente di miyones di pueblo door di su famianan. Lanza un falsedad di un waya di coriente di Colombia pa Aruba primintiendo nos pueblo cu e lo baha prijs di coriente cu 50%. A pone Glenbert ariba lista y te awe no a bin duna cuenta cuanto placa Bouterse a pone den campaña di MEP. Di Schotte no por bisa nada ainda pasobra e ta un sospechoso cu por sali liber di tur acusacion pero di Desi y Dino ta conoci rond mundo cu nan tur dos a worde condena pa crimennan serio. Desi Bouterse a worde condena na Hulanda pa 15 aña di prison y Dino Bouterse a worde condena pa 8 aña di prison na Surinam mes.
Esaki Evelyn tabata sa y esaki Glenbert tabata sa. Pa carga hendenan asina ariba un teblachi y acepta placa di nan pa campaña ta prueba di un mentalidad di shouru cu aparerentemente ta cuminza habri wowo di e nucleo di MEP. Esnan cu kier pa Evelyn bay ta mira kico tur hende na Aruba sa di Evelyn pero nan mes sa mucho mas y nan a yega na e conclusion cu Evelyn no por keda lider mas pasobra esaki ta bay ta fin di e partido den corto tempo. Cosnan no ta sosode por nada. Evelyn tin simannan ta grita contra un hende drechi manera nos ministro presidente Mike Eman cu Mike lo tin amistad cu un gobernador di Venezuela sabiendo bon bon cu esaki no ta berdad.
Awo Evelyn mester wak su mes actuacion intimo cu un amigo politico di Curaçao na television pa tur hende aprecia cu e ta amigo di Schotte. Mescos cu Glenbert cu ariba su facebook tabatin un cantidad di potret cu e Boutersenan pa mustra mundo con bon amigo y socio e ta di hendenan conoci rond mundo como criminalnan grandi. Glenbert a haya su mes ta bin splica despues cu e a gaña di no ta den negoshi cu e Boutersenan cu e tabata diep diep den negoshi cu e Boutersenan pero no den droga y arma solamente den negoshi di oro y petroleo. Ser socio di criminalnan grandi, biaha pariba pabao den private jet, core den autonan di centenares di mil Florin y biba manera e grandinan den crimen anto bin ofende hende drechi manera Mike Eman no ta keda sin buelto.
