ORANJESTAD(AAN): E chollernan parce a bira e habitantenan principal di Stadhuis. E directora mes ta trahando eynan desde 2009 y desde prome dia e molester di choller tabata presente.
E directora tabata polis tambe pues e tin conocimento con pa atende cu e chollernan cu ta hasta a yega di menaza cu agredi cu baranca den man.
Diabierna un biaha mas e area di Stadhuis net den porta di e directora cantidad di porkeria a lanta riba e piso. Esaki ta algo cu ta pasa tur ora pero a cuminsa bay for di man. Saconan cu restonan di paña y pipa pa huma droga ta parti di loke ta keda benta riba e piso.
Stadhuis ta un caminda cu hopi local y masha turista ta bin casa. Ademas di orina nan ta laga nan otro sushi humano tambe riba e pida cu e parehanan y famia mester drenta. Tabata tin casonan caminda turistanan tabata susha nan panja di bruid drentando pa bay casa. Otro hendenan mester lanta nan panja pa no susha. Autoridad tan a altura.
Gobierno a haya carta y monumenten fonds ta hopi bon na altura. Aunke ta sera e cura tog e chollernan ta drenta. Ta destrui spotlight etc pa asina por haci nan bagamunderianan na nan antoho. E directora a boga pa haya seguridad constantemente na Censo pa asina evita e problema aki.
E edificio aki ta uno cu mester worde cuida pasobra ta un monumento cu tin un rol importante. Awor lo renoba e lugar pues mester sigui cuida esaki. Pa colmo nan a cuminsa bira victima di ladronicia tambe. Varios parti di Stadhuis ta sera cu plywood pasobra ladronnan ta busca cos di horta. Eyden no tin nada di balor pa ladronnan. Ta coy trabao cu chollernan no por usa pa bay bende pa haya placa. E directora ta spera cu nan haya oido y pone e seguridad pafo durante oranan di anochi pa mainta y asina evita e problema di choller cu lo por hiba e lugar den un decadencia peor.
