Arubus ta mas pa turista cu pa pasaheronan local:
ORANJESTAD (AAN) – Na nos mesa di redaccion a drenta algun critica di pasaheronan vast di Arubus, cu no ta mucho contento cu e turistanan crusero ta haya preferencia riba e usuarionan local.
Pa cuminza, diaranzon un usuario a yama nos basta disgusta pasobra e mester a warda hopi, merdia, pa por a subi bus mientras cu su tempo pa yega trabao tabata na rand.
Prome cu tur cos, mester a warda pa e chofer duna cent sobra na e turistanan cu nunca por paga cu e placa net. E pasahero local den su mayoria tin smartcard, pues pa mas largo cu e rij di localnan por ta, e fluho ta bay lihe pa nan paga y sinta.
E turistanan ta esnan cu ta pone perde tempo tur pasahero cu ta pura pa yega trabao. Despues tabata tin como cuater turista di cual un tabata riba rolstoel. Mester a warda pa e personanan yuda nan ser keri para y tene pa subi bus, mientras cu otro tabata dobla e rolstoel pa por a acomode den e bus. Algun di e pasaheronan local wardando den rij a rabia y a puntra si asina pichiri e hendenan aki ta cu ni den circumstancianan asina nan por paga un taxi!
Mescos ta conta pa turistanan cu ta bin cu mucha chikito riba stroller. Cu santo pasenshi, un pasahero a conta, algun siman atras e mester warda pa un pareha turista crusero, subi Arubus con nan morochonan y pa nan cera y acomoda e dos strollers cu despues a crea masha problema, pa e pasaheronan cu mester a baha prome.
Diahuebs mainta, manera custumber ora tin crusero, e rij di turistanan tabata hopi largo. E bus di Arubus tabata completamente yen, te hasta den e trapi di e porta meymey di salida, tabata tin hende para cu nan muchila, y esnan local cu mester a baha den e area di supermercadonan casi no por a baha y persona a trompica cu muchila mal poni den hang, y esey ta motibo cu el a tuma contacto cu nos redaccion, pa nos trece su critica dilanti.
Un otro persona cu ta trahador di hotel a comenta cu e turistanan crusero di verdad ta gasta minimalmente na Aruba y sigur den e demas destinacionnan cu nan ta bishita tambe. Esnan cu ta subi bay keiro riba tram na Caya Grandi, ora nan bin back ta para direct den rij pa bay lama, cu ta e meta di e gran mayoria, y nan no ta cumpra net nada. Un bez mas a wordo expresa cu a bira ora pa gobierno cuminza cobra e turistanan un fee di sikiera un dollar pa subi e tram!
