ORANJESTAD (AAN): Pa di 13 aña consecutivo AHATA su Comision di Medio Ambiente ta organiza competencia di obra y arte recicla. E aña aki e competencia lo tuma lugar 14 pa 25 di April, na Cas di Cultura.
E ultimo dia pa inscribi ta dialuna 1 di April pa categorianan individual y grupo y pa scolnan ta 7 di maart.
Durante transcurso di añanan AHATA su Comision di Medio Ambiente ta organiza e expo y competencia aki. Ta di remarca e tremendo creatividad, unda cu participantenan ta re-usa y por sigui re-usa, foam, bleki, plastic, papel, glas, aluminium of carton y usando verf y lijm adicional.
E competencia ta consisti di 7 diferente categoria: kleuter scol, scol basico di 1ste te cu 3de klas, scol basico 4de te cu 6de klas, scol secundario, individual amateur, individual profesional y grupo/hotel/negoshi. Tur participante lo haya un certificado y e ganadornan lo haya premionan di diferente sponsor.
AHATA kier gradici ya caba e scolnan, gruponan y personanan cu a registra. E interes e aña aki a crece un biaha mas y ta mustra cu lo tin hopi obra y arte recicla durante e exposicion.
Huradonan lo basa nan escogencia riba: e producto cu a wordo uza, creatividad, detaye y acabado, porcentahe di material recicla uza, tecnica cu a wordo usa, kico por haci cu e obheto, si e participante a usa materialnan re-usa y por ultimo si e participante a usa un of mas di materialnan re-usa.
Como un toke interesante y valioso AHATA ta ofrece un biaha mas un tayer di arte na e scolnan participante. E aña aki e tayer ta wordo duna pa señora Raquel Bautista kende ta Guest Historian na Hyatt Regency Aruba Resort & Casino. E tayer di arte recicla ta opcional pa e scolnan participante y ta completamente gratis, esaki ta wordo ofreci cu e solo proposito pa crea concientizacion cerca e studiantenan y tambe pa inspira nan pa ta creative y na mes momento yudando e medio ambiente. Adicionalmente e scolnan participante tin e opcion pa ricibi bishita di Ecotech Team y asina haya un presentacion riba reciclahe y desperdicio na Aruba.
AHATA su Comision di Medio Ambiente ta invita pueblo pa bishita e exposicion for di 14 te cu 25 di April na Cas di Cultura di dialuna pa diabierna di 10:00am – 12:00pm y di 2:00pm – 6:00pm. AHATA ta informa nos comunidad cu durante e dianan di 18, 19, 20 y 21 di April e exposicion lo ta cera. Pasa admira e creatividad cu nos comunidad ta ofrece. No lubida ENTRADA TA GRATIS. Di e forma aki AHATA ta desea di corda nos comunidad riba e 3-R: Reduci, Re-usa, Recicla.
Pa inscribi of haya mas informacion por yama libremente oficina di AHATA of email vanessa@ahata.com of marisol@ahata.com.
Tur persona ta keda cordialmente invita pa asisti. Sea creativo y consciente pa cuida nos medio ambiente!
