ORANJESTAD (AAN): Durante e dianan di Pasco cuminsando desde 24 di december pa 6or di atardi te cu 27 di december 6or di mainta Departamento di Emergencia a atende 270 pashent di cual 14 pashent tabata relata na incidentenan cu a pasa den nos comunidad. Departamento di Emergencia tabata bastante ocupa, pero tabata prepara pa esaki.
E edad di pashent di incidentenan a varia entre 6 aña pa 61 aña. A atende 8 pashent cu a drenta Departamento di Emergencia pa via di accident di auto. Di e 14 pashent, 4 a drenta pa motibo di maltrato, 1 pa intoxicacion di alcohol y 1 pashent cu herido causa pa vuurwerk. Di esakinan, solamente 1 pashent tabata di un gravedad pa ser admiti den Hospital.
Dokter di Warda of conoci manera Huisartsenpost a mira no menos cu 200 pashent desde 24 te cu 26 di december, kiermen tabata ful yen durante e dianan aki.
Hospital ta informa cu orarionan di bishita ta riba dia 1 di januari entre 11.30 di mainta te cu 8or di anochi. Departamento di ICU/MCU/CCU ta habri orario regular pa bishita cual ta entre 12or cu 1or y 7or pa 8or. Otro dianan por bishita e pashent riba piso durante orarionan di custumber cu ta 11.30 pa 1or y 6or pa 8or.
Huisartsenpost lo ta habri dia 1 y 2 di januari mescos cu e orario durante weekend cual ta di 9or di mainta te 1or di merdia y 6or di atardi te 10or di anochi.
Durante e ultimo dianan di 2014 celebrando fin di aña departamento di Emergencia ta pidi un y tur pa bay poco poco riba caminda pa asina evita peliger, evita consumo di alcohol excesivo y no stuur si bo a consumi alcohol. Tambe sea hopi cauteloso cu vuurwerk, protehando bo mes y otro.
Hunta di Directiva, staf y personal di Hospital kier a desea Aruba henter un feliz aña 2015 sin peliger, yena cu salud y amor.
