Home Hudicial Si mi no tabata sera mi a evita cu Yellow a tira...

Si mi no tabata sera mi a evita cu Yellow a tira mi colega mata

2
0
SHARE
- Advertisement -

Guardia di club nocturno a bisa Hues

ORANJESTAD (AAN): Despues di a scucha Fiscal exigi 18 luna di prison p’e, e guardia di club nocturno M.R.L. a bisa Hues cu si e no tabata sera pa posecion di arma di candela, e lo por a evita cu Yellow a tira su colega mata y herida e otro colega seriamente.

Segun M.R.L. ta masha hopi hoben ta cana rond arma y e sa con pa anda cu nan.

POSECION DI DOS ARMA:

E acusacion cu Fiscal a presenta contra M.R.L. ta cu riba 20 November 2015 e tabatin hunto cun’e un pistol y un revolver.

Hues a mustra cu segun e procesverbaal di Polis, dia 20 November 2015, Polis a bay controla e auto staciona ariba beach y a constata cu M.R.L. tabata hunto cu dos otro Venezolano. Un di nan a resulta di ta forma parti di e grupo cu ta bende armanan.

Polis a haya M.R.L. cu un revolver mey mey su pia cual revolver tabata carga. Tambe a haya den e bahul di auto un pistol cu 10 bala y un otro peña cu ta carga 30 bala. Tambe a haya un jacket contra bala.

USA ARMA PA PROTECCION:

Na Polis, M.R.L. a bisa cu e armanan ta di dje y cu e pistool tabata un deposito riba 1.500 Dollar cu a fia un persona. E revolver ta di un amigo di dje cu e ta cana cun’e. Hues a puntra pakico e ta cana arma. M.R.L. a bisa Hues cu un vez el a worde tira. E kier a mustra Hues e sicatriz di e tiro den su banda. Hues a bisa cu no ta necesario.

M.R.L. a bisa cu e tin e arma pa defensa propio y ta lag’e den auto. El a bisa cu ora e ta traha como guardia e no ta baha cu e arma aki. Hues a bisa cu den auto tabatin un jacket contra bala. M.R.L. a bisa cu e no tabatin intension pa tira hende cu arma.

El a bisa cu den su trabao el a kita hopi arma di hende cu kier drenta den e club nocturno y no ta haya cu e ta haci malo. Hues a bisa cu e sa cu ta prohibi pa tin arma. Hues a mustra cu na 2003 y 2006 el a worde condena pa arma.

EXIGENCIA DI FISCAL:

Fiscal a bisa cu dia 20 November 2015 M.R.L. tabatin dos arma di candela y balanan. Fiscal a sigui bisa cu M.R.L. mes a bisa cu e armanan ta di dje. El a bisa cu un arma tabata manera un deposito di prestamo y e revolver ta di un amigo.

Fiscal a mustra cu den pasado caba a condena M.R.L. pa posecion di arma y e sa masha bon cu arma di candela no ta bon. E sa masha bon con peligroso arma di candela ta.

Na opinion di Fiscal, M.R.L. tabata cu e armanan riba caya. Un di e armanan tabata mey mey di su pia cla pa usa. E otro tabata den bahul di e auto. Fiscal ta haya e caso aki hopi serio. El a bisa Hues cu en total ta 45 bala a confisca.

Fiscal ta haya cu mester baha pisa mirando cu na 2003 y 2006, M.R.L. a cay sera caba pa arma. Na opinion di Fiscal, no por atende M.R.L. como first offender sino residivista. El a exigi 18 luna di prison. Tambe Fiscal a exigi pa destrui e armanan y balanan.

DEFENSA DI ABOGADO:

Abogado mr. Caster a bisa Hues cu M.R.L. a admiti di tabatin armanan di candela. Pa e acusacion di complice, e abogado a mustra cu segun sentencia di Hof mester tin mas puntonan pa por papia di complice. Mester tin un cooperacion estrecho y no por prueba esey den e caso aki.

El a bisa cu e Venezolano V.C. tabata den auto cu M.R.L. y tabata sa di e arma pero e otro pasahero no. Un di e armanan tabata cu M.R.L. mientras cu e otro tabata den e bahul di e auto. E abogado no ta kere cu por prueba aki di complice di posecion di arma.

E ta haya cu mester declara M.R.L. liber pa esaki. Pa loke ta posecion di arma, e abogado a mustra cu M.R.L. a splica caba y e ta referi na decision di Hues.

E abogado a bisa Hues pa tene cuenta cu desde 2006, M.R.L. no a cay den man di husticia mas pa posecion di arma. E ta traha como guardia di un club nocturno y e doño ta dispuesto pa tum’e back den servicio pa motibo di su bon trabao. E abogado a pidi pa duna un castigo igual na loke M.R.L. a sinti caba.

POR A EVITA MATAMENTO:

M.R.L. a bisa Hues cu desde e tabatin 18 aña e ta trahando como guardia. Awor e tin 51 aña y no a bira hende di placa cu e trabao aki. El a bisa cu diferente biaha el a cay sera pa haci su trabao. Segun M.R.L. e unico motibo cu e ta haci’e, pa percura segurida y salba bida di hende. Na opinion di M.R.L., e hendenan den club ta sinti nan mes bon y sigur ora e ta traha.

M.R.L. a bisa cu dos di su coleganan a worde tira na e club y un di nan a fayece. Cu cara tristo el a bisa cu door cu e tabata sera, e no por tabata presente ora di e incidente. El a bisa Hues cu ta masha hopi hoben tin arma. E conoce 40 incluyendo Yellow cu a tira mata su colega.

Den su cel e tin un potret di Yellow y tur esnan rond di dje. Segun M.R.L., pa 8 luna Yellow tabata un peliger promer cu el a tira su colega. Segun M.R.L., e ta esun cu por papia cu nan y conoce nan forma di pensa. E ta kere cu si e tabata afor, ningun morto lo no cay. Ta pesey su doño sa con importante y valioso e ta den su trabao. E kier pa haya su libertad pa e por traha.

SENTENCIA:

Hues a bisa cu e ta sera tratamento di e caso y ta dicta sentencia di biaha. Hues a bisa cu e ta declara M.R.L. liber pa complice. El a bisa cu e ta haya proba posecion di dos arma di candela. Hues ta haya cu M.R.L. mester sa masha bon ki peligroso arma di candela ta. E mes a worde herida door di un tiro. Hues a bisa cu M.R.L. no mester cana arma. E ta haya cu M.R.L. mester a entrega e armanan na Polis.

Na opinion di Hues, corectamente Ministro Publico a baha pisa. El a confirma exigencia di Fiscal y condena M.R.L. na 18 luna di prison kitando e tempo cu e tabata sera y pa destrui e armanan y balanan.

Riba comentario di mr. Caster tocante e pertenencianan di M.R.L., Hues a bisa cu M.R.L. lo haya su jacket contra bala back y otro pertenencianan cu e tabatin den e auto.

 

- Advertisement -

DUNA COMENTARIO

Please enter your comment!
Please enter your name here