Aunke 2 tin conseho negativo…
ORANJESTAD (AAN): Parlamento prome cu reces lo trata den pura 5 ley riba un solo dia. MEP a informa, cu no ta exclui e posibilidad cu lo no keda cla riba e mesun dia, pero di tur forma ta un acto sumamente iresponsabel pa forsa 5 ley den un solo dia.
E leynan ta: (1) Presupuesto di Raad van Advies 2017, despues di a pospone 4 biaha. Nos ta contento cu porfin e ley aki ta bay worde trata, y nos ta spera cu e presidente di parlamento no pospone esaki pa di 5 biaha. Ta un falta di respet pa e instituto halto di estado aki cu parlamewnto no a trata e ley aki ainda.
(2) Cambio di instalacion di ministerionan despues cu Otmar Oduber a tuma su retiro. Fraccion di MEP su opinion ta cu no mester a apunta un di 9 minister, mester a lag’e na 8 minister. Ademas, nos kier sa kico ta bay pasa cu tur e coordinadornan di ex minister Otmar Oduber.
(3) Presupuesto supletorio 2016, cu ta ilustra e cambionan riba presupuesto pa e gastonan cu gobierno a sobrepasa. Mester remarca cu e ley aki tin un conseho negativo di Raad van Advies, cu ta haya esaki no realistico y ta urgi gobierno pa no manda e ley aki parlamento. Sinembargo gobierno no ta haci caso di esaki, y a mande asina mes!
(4) Cuenta anual 2015, cu ta mustra cuanto gobierno a sobrepasa e presupuesto pa 2015 tambe, cu tambe tin un conseho negativo di Raad van Advies.
(5) Cambio di ley di motorrijtuigenbelasting, pa asina duna Departamento di Impuesto mas autoridad pa cobra e suma aki. Despues di e anuncio cu mas di 60% di automobilistanan a keda sin paga e belasting aki, gobierno kier haya mas poder pa manda cobransa den caso cu un persona no paga, y persigui pa bo paga e belasting aki. Locual cu gobierno no ta tene na cuenta ta cu hendenan no tin placa, economia ta den recesion, placa no ta yega, y esey ta refleha su mes tambe den pagamento di belasting.
Fraccion di MEP ta haya un acto sumamente iresponsabel pa trata 5 ley riba un mesun dia.
