ORANJESTAD,(AAN); Tin biaha bo tin cu sinta keto y lesa cu trankilidad bo corant pa haya sa con nos ciudadanonan no ta para keto y nan tambe ta sali busca haci esfuerzo pa recupera locual individuonan ta pasa horta.
Pero manera expertonan di Scotland Yard a yega di expresa, ningun crimen ta perfecto. Aki por lesa e siguiente version di polis.
Tabata den transcurso di Diadomingo mainta, a drenta informe cu a solicita intermediacion di polis na Sero Pela.
Patruya di Noord a wordo dirigi pa atende e caso y na yegada e ciudadano di incial P. a relata na Polis, cu riba Diasabra dia 22 di April, su esposa a entrega un denuncia di ladronicia di nan tres puppy Pitbull.
Segun e ciudadano di inicial P., el a sigui stapnan (sea marca zapato, keds, pia abao) di su cas te na un tereno di cas na Sero Pela. E tin e sospecho cu e cachonan ta paden den e cas encuestion.
Polisnan a bay papia cu e habitante di e cas cual ta e señora inicial S. y e ta declara cu enberdad el a cumpra un Pitbull di un tal “Robert” pa e suma di 400 Florin Arubiano.
Un tal T. F. a manda e señora S. un informe via Whatsapp pa cu nan kier bende e cacho encuestion. E doño di cacho inicial P. facilmente a identifica e Pitbull como esun di dje. E tin potretnan riba su telefoon cu ta confirma esaki.
Asina S. a entrega e Pitbull voluntariamente bek na P.
Pero e dos otro cachonan puppy, parce segun P., ta den un cas situa na Lucerostraat na Playa.
Patruya di Oranjestad e ora atende e asistencia. Nan a bay na un adres den Lucerostraat na unda segun informe suministra pa e persona reporta cu un di su cachonan Pitbull ta na e adres.
Polis di Oranjestad a papia cu e habitante D.T., y e ta declara, cu e tin un cacho bieu cu tres pata y e no tin puppy Pitbull. DT a laga patruya wak den cura y den cas y no a descubri ni topa puppy.
Mientras investigacion ta continua buscando e dos otro pitbull puppy’s. Un homber (cu tabata na Shaba) a declara cu nan tin su cacho horta. Patruya bay na altura di Polyrama’s y papia cu e homber inicial P. y e ta declara di a haya tip unda su puppynan horta ta.
Patruya a bay na Sero Patrishi y polis na e direccion a controla un que otro y P. a laga polis wak e potretnan di su puppy nan. Pa su malasuerte, e cachonan na Sero Patrishi no ta di dje.
