ORANJESTAD(AAN)– Circle K di Universidad di Aruba a organisa un tremendo sportdag pa e alumnonan di Colegio Santa Teresita.
E alumnonan a cuminsa nan mainta cu varios wega entre otro: tira blaas cu awa, bowling, futbol y sponge relay. Den pauze e alumnonan a disfruta di un dushi lunch y na final tur participante a haya un regalito pa hiba nan cas. E alumnonan y miembronan di Circle K seguramente a pasa un dia hopi dushi.
E proyecto ‘Pasa Dushi cu CKI’ tin mas cu 10 aña di existencia y ta wordo organisa varios biaha pa aña door di e miembronan di CKI. E evento aki tin como meta pa promove movecion entre e muchanan y asina duna nan e oportunidad pa hunga y disfruta di un dia yena cu alegria.
Circle K Club di Universidad di Aruba kier a gradici Colegio Santa Teresita, IBiSA, y tur boluntario cu a haci e evento aki un exito.
Sin falta CKI ta gradici pueblo di Aruba pa kere den e Club y cu semper ta contribui na e proyectonan. Sin ayudo di nos comunidad, proyecto manera ‘PasaDushi cu CKI’ no lo ta posibel.
