ORANJESTAD (AAN): E yiu homber di Diomedes Diaz, a caba di perde su bida Diabierna na Colombia. E tambe a fayece un dia despues di a duna un gran concierto.
E cantante di vallenato Martín Elías Díaz Acosta a fayece Diabierna merdia, despues cu el a sufri un accident di auto moviendo na Colombia for di Coveñas pa Valledupar den un vehiculo tipo SUV. El a sali for di un concierto na Coveñas cu a finaliza pa 6:30 am, y e accident mes a socede pa 7:30 am na altura di Aguas Negras. Muy probablemente un wiel a rementa, y esey a pone cu e chofer di auto a perde control. E SUV a cuminza bolter varios biaha, y aunke e vehiculo tin airbags dilanti y tambe na banda, parce cu e artista a wordo lanza for di SUV.
Den e auto tabatin cuatro hende mas, y nan a resulta herida tambe pero no mucho grave.
“El Gran Martín Elías” a haya cap na cabez, y el a haya golpi na su pulmon, y cinco biaha el a stop di hala rosea. Pesey Docternan mester a bay opera mesora, y despues a pone den Unidad di Intensive Care. Sinembargo su curpa a perde e bataya, y e cantante di 26 aña di edad a fayece.
Martín Elías a yega di duna concierto na Aruba tambe, unda e tin un fanaticada grandi. Un tristeza enorme ta reina e momentonan aki rond Colombia, como tambe riba e isla aki.
E tin total di 16 aña den mundo di farandula, y lo mas peculiar ta cu su tata Diomedes Diaz, tambe a fayece despues di a duna concierto. Condolencia na su famia y fanaticonan.
