ORANJESTAD,(AAN): Tin investigacion ta andando relaciona cu hortamento di aparatonan sofistica cu ta wordo usa pa tratamento medico. Ta trata di un “Endoscopio” cu docternan ta usa pa wak via boca of anus den curpa di pashent. E tipo di aparatonan aki lo ta bal na e momentonan aki basta placa y traficantenan di droga lo ta paga capital pa podera di esaki nan.
Pa controla gulidonan di bolita ora nan yega nan destino y cuminsa saca bolitanan cu nan guli si acaso lo por tin mas bolito’s den nan curpa.
Ta asina cu lo a tuma lugar investigacion na Grecia debi cu tin di e aparatonan aki cu a wordo horta.
Debi cu lo a manda e aparatonan cu documentonan pa paisnan di Latina America, a resulta cu algun di e paketenan aki a cay den man di polis Colombiano y a confisca esakinan. Segun e versionnan na Colombia den e paketenan a bin descubri cuater di e aparatonan aki cu lo a wordo horta for di hospitalnan na Grecia.
E periodista Yiannis Papadopoulos recien, segun informe, lo a bisa Omroep Brabant cu ta hopi investigacion el a haci, cu esnan meti lo ta conoci di di polis Colombiano.
Parce cu lo ta trata di un muher y tres homber cu lo a yega na Grecia como turista y na cierto ocasion como pashent. Segun e fuente nan lo a bishita e hospital pa orientacion prome cu nan a pone man riba e aparatonan.
Cartelnan di droga lo ta usa e aparatonan aki pa controla gulidornan di bolita pa si por a keda bolita di cocaine den nan curpa. Investigacionnan ta continua y hospitalnan, clinicanan sigur a aumenta nan seguridad debi cu e aparato nan aki ta costa mas o menos 10 mil euro. Pero lo ta facil pa bin descubri nan debi cu nan serialnan ta “UNICO”.
