ORANJESTAD (AAN): Diabiena ultimo Monumentenbureau a forma parti di e celebracion di Salud Publico su 100 aña di existencia. Na e ocacion aki tabata invita Ministro di Cultura, Sr. Mr. M. G. Eman, Ministro di Salubridad Publico, Sr. Drs. C. A. Schwengle y Departamento di Salud Publico.
Ministronan a elabora riba e trabaonan excelente ehecuta y logronan exitoso riba tereno di Salubridad Publico durante e periodo largo aki, tambe a enfantisa riba e edifcio monumental proteha desde 28 di September 2010 unda Departamento di Salud Publico ta ubica aden. Tambe Ing. Raul Gei como di dos director suplente a hiba palabra representando Monumentenbureau.
E edificio aki, situa na Caya Ingeniero R.H. Lacle 4, cu ta construi den añanan 1955, tin un balor di suma importancia pa pais Aruba debi na su typologia, arkitectura y historia cultural. E tipo di edificionan asina aki no tin mas na Aruba. Su arkitectura ta un tipo di estilo di e departamento di D.O.W. cual nos ta reconose na su symetria y su colornan tradicional cual ta licht geel y blanco.
E edificio cu Salud Publico ta aden ta proteha. Nos por reconose por medio di e “Seyo di Monumento Proteha” pega riba e edificio, cual a worde instala 28 di maart 2017. E Seyo aki tambe tin su historia, e symbolo di e Seyo cu ta significa proteccion di e lugar. E “Seyo” aki ta worde instala na tur edificio monumental proteha.
Monumentenbureau encabesa pa señora directora Yvonne Webb Kock B. Sc. a lidera diferente restauracion di nos monumentonan na Aruba. Aki a inverti mas di 55 miyon den nos monumentonan, pa e historia di cada edificio no bay perdi.
Monumentenbureau su portanan semper ta habri pa un y tur pa duna asistencia den forma di conseho tecnico of di preparacion pa restauracion di edificionan monumental. Banda di esaki tambe ta yuda pa educa nos muchanan pa medio di charlanan na schoolnan basico tocante e importancia di conserva nos patrimonio nacional.
Monumentenbureau ta gradici Departamento di Salud Publico cu semper tin e confianza pa acerca nos pa haya informacion tocante nan edificio proteha.
