ORANJESTAD(AAN): Despues di full e discusion entre SV Dakota , SV Deportivo Nacional, Protesta, beroep y ken lo hunga contra SV RCA den final, finalmente AVB anuncia cu SV Deportivo Nacional lo hunga e wega final contra di SV RCA. Locual cu a keda pending, ta ki dia e weganan final lo inicia. Diahuebs atardi Diario Deportivo a ricibi e grato noticia, cu e partido final lo inicia diamars 27 di Juni. E weganan lo tuma luga den Stadion Guillermo Prospero Trinidad y ta programa pa inicia 8’or di anochi. Portanan lo habri ya caba for di 7:30pm. Ambos ekipo ta priminti di yena stadion cu nan fanaticonan. SV RCA ta conoci cu ora cu nan yega final, nan fanaticonan ta Sali den abundancia, y awo despues di 7 Aña sin ta den final, SV Deportivo Nacional sigur lo baha cu Noord y vecindario completo pa duna apoyo. Di parti SV Deportivo Nacional nos a compronde musica lo ta den man di Dr.Eli y Big Rig, y animacion lo ta den man di MC Carty. Te ainda SV RCA no a duna un hint kico nan tin prepara, pero sigur nos sa cu esaki lo ta un bomb. Un chuchubi a bisa cu nan ta buscando Ataniro y Phattunez. Con berdad esaki ta, nos no sa, pero diamars awo nos lo haya sa, ora cu e dos ekiponan aki topa otro.
