ORANJESTAD (AAN): Patruya di polis seccion Noord a wordo dirigi diamars mainta pa alrededor di 09:40 na Calabas relaciona cu maltrato. Na yegada a resulta cu no ta trata di maltrato pero ladronicia cu violencia.
Polisnan a papia cu e señora inicial T. y polis a constata cu e señora ta hopi nervioso. Ademas polisnan a observa cu e muher tin otro banda di cara drechi ta hincha. Relaciona cu e observacion polis a solicita via central di polis presencia di un ambulans.
E señora a declara di ta sinta den patio y e porta entrada ta habri y e ta scucha sonido ta bin for di sala y el a bay controla den sala y e ta wak un vaas cu ta poni riba cashi ta na suela tur destrui.
Direpiente e ta wak un homber desconoci para su dilanti. E homber desconoci no ta tin permiso pa ta keda den cas. E homber desconoci ta bisti cu carson cortico preto, e homber ta color bruin, y postura delega ademas e homber desconoci no ta tin t-shirt bisti y riba cabez e tin muts y cu bril scur na cara y e tipo desconoci su estatura ta 1.75 mtr.
Tromp a declara cu e homber desconoci a dale cu mokete sera den su cara banda drechi consecuentemente pa cual el a cay na suela. Despues di e acto aki e homber desconoci a core bandona e cas den direccion pabao.
E denunciante a ripara cu un homber desconoci a horta su potmoni preto cual ta poni riba mesa den cushina. E potmoni preto ta di marca Guess, balor ta desconoci y den dje tin carchi AZV, un pas di banco CMB, un Visa card CMB y 2 papel di 100 florin, 1 papel di 25 florin, 2 papel di 10 florin.
Pa medio di un colega polis e potmoni a wordo haya pabao di e cas Calabas 17. E potmoni ta na suela benta y e ta habri.
E homber desconoci a saca solamente e placa for di e potmoni. Ta di spera cu corto plazo e malhechor aki autoridad pone man riba dje.
