ORANJESTAD (AAN): Un informe international a hala nos atencion y ta trata di un caso serio cu a tuma lugar na Corsow. Ta asina cu desde luna di Maart 2017 cuerpo policial na Corsow a emiti un informe den cual nan ta buscando un homber perdi “Hussein El Naijar” naci na “Libanon” di 51 aña di edad y e ta keda temporalmente na Corsow.
Hussein a sali di cas diaranzon 22 maart 2017 anochi pa alrededor di 9 or y 17 pa bay Palo Blanco y e no a bolbe. Mientras tanto diamars 15 di April 2017 a bin haya un curpa sin biba na altura di Klein Hofje na Maracana.
Pero mientras tanto Nederlands Forensisch Instituut (NFI) na Hulanda a determina cu siguranza cu ta trata di e homber “Hussein El Naijar” (Libanon 1966). Relaciona cu esaki Ministerio Publico (OM) di Corsow a duna e curpa liber pa entiero, pues pa wordo repatria pa su pais natal Libanon.
Dialuna mainta ultimo segun version, a tuma lugar basta desaroyo relaciona cu e investigacion encuestion. Fiscal a confirma detencion di tres persona cual dos ta wordo sospecha directamente envolvi den e asesinato.
Segun informe riba mesun dialuna mainta trempan un team di recherche encarga cu homicidio conhuntamente cu e team di Atraco ademas cu team di Aresto a haci detencion di e tres hombernan sospechoso.
Nan detencion ta relaciona cu e curpa sin biba di Hussein haya den area di Klein Hofje. Na Frederick straat polis a detene e hombernan R.J.R.V. naci na Venezuela di 25 aña y na un cas situa na Seru Fortuna a detene e homber S.H.A. naci na Corsow di 23 aña.
Mientras na De Savaan polis a detene e homber L.A.A.G. naci na Venezuela di 26 aña, tur tres deteni relaciona cu asesinato y nan ta cera.
Tambe un cas situa na Savaan y ademas un cas na Fuik, durante di e investigacion polisnan a detene tres homber y dos muher di nacionalidad Venezolano cu no por a presenta e documentonan necesario pa por permanece riba e Isla Corsow. A hiba tur cinco pa departamento di Imigracion di Rio Canario pendiente di nan deportacion. Investigacion den e caso di asesinato ta continua.
