ORANJESTAD (AAN) – Awe, Diabierna 15 di September 2017, Costa Rica (y demas paisnan di Centro America) ta celebra e di 196 aniversario di Independencia.
Prome cu Costa Rica a wordo independiza, e tabata teritorio Spaño y Guatemala tabata e centro di Gobierno Regional.
Na luna di September di 1821 e Capitania General di Guatemala a tuma e decision di independiza su mes for di Spaña y simultaneamente a independiza Costa Rica tambe.
No obstante, te dia 13 di October 1821 a yega na e Capital e tempo ey Cartago (Antiguo Metropoli di Costa Rica) e copianan di e Acta di Independencia di Guatemala y e Acta di Leon di Nicaragua.
Un bez cu a ricibi e Acta di Independencia, a wordo celebra un reunion general di Ayuntamentonan di e Provincia, den cual a acorda independiza Costa Rica for di e Confederacion General di Guatemala pa asina e por a pasa bira un Estado. E Acta ey a keda subscribi dia 29 di October 1821 den e Ciudad di Cartago y tabata don Juan Manuel de Cañas, ken a ocupa e cargo di Gobernador e persona cu a nombra Juan Mora Fernandez como Hefe di Estado.
Importancia di e Acta di Independencia:
Conoci como e Acta di Cartago, esaki ta hopi importante pasobra den dje ta wordo expresa libremente, e boluntad di e costaricensenan di constitui un Estado Independiente, doño di su propio destino soberano, pa elegi su mesun gobierno; y e ta pa medio di desfilenan y actonan civico cu for di e dia ey a nace e tradicion di conmemora e Declaracion di Independencia for di Spaña, firma na Guatemala dia 15 di September 1821.
E desfilenan:
E historia di e desfilenan conmemorativo ta data di aña 1915, tempo cu don Alfredo Gonzalez Flores tabata presidente y a cuminza disminui e cantidad di militarnan cu tabata participa den e actividadnan di Dia 15 di September y reemplaza nan pa studiantenan di scol.
Añanan despues, e imagen di Costa Rica como nacion pacifista a worde mas defini y e desfilenan a bira un fiesta studiantil cu ta wordo disfruta te awendia, unda cu den tur provincia miles di alumno di scol y colegio di secundario ta desfila riba caya pa conmemora e grito di Independencia Nacional.
Pabien na e residentenan Costaricense aki na Aruba.
