Comentario:
Pa Mercedes Monge
Inspira cu awe ta Dia Internacional di Paz, mi kier a expresa mi deseo pa nos bay urna electoral mañan, den armonia cu otro y yen di paz interior, conciente di nos voto. Nos voto ta reforza nos democracia y nos civismo.
Nos a yega e recta final. Ban vota mañan den paz y armonia como un solo pueblo, bao e mesun bandera: Aruba!
Ya e temporada di parti culpa aki aya mester keda atras. Pa nos e derecho di voto ta un fiesta di cual hopi otro pais no por disfruta, y te awe nos ta un Isla hopi bendiciona. Ban pensa un rato cu mientras nos ta na caminda pa elegi nos Parlamento y Gobierno, mañan cu Dios su poder, pasando den dianan di calor sofocante pero gozando di tur libertad como pais, tin paisnan rond di nos y otronan un tiki mas leu, sufriendo un dolor inmenso, causa pa e naturaleza.
Wak Mexico mas cu 200 persona morto y otro tanto cu a disparce door di teremoto. Un scol cu a bin abao cu consecuencia di 21 mucha cu a fayece. Danki Dios, pa mas cu e situacion di nos rumannan aki ta haci nos dolor den nos curazon, nos no ta den nan zapato y Dios kier cu nunca nos lo ta tampoco.
Nos tin hopi di gradici Dios y nos mama naturaleza cu ta asina generoso cu nos pueblo. Un manera di gradici ta pa laga furor politico un banda y bay vota trankil. Ban laga atras ofensa di ciudadano pa ciudadano, respetando e diferencia di opinion di otro. Democracia ta précis cu tin espacio pa escogencia liber, sin presion di ningun hende, pa vota pa un partido pa conviccion y no pa obligacion.
Ban corda cu tin un bandera cu ta esun di mas importante: e bandera di Aruba cu ta cubri nos tur y ningun partido individual.
Mi ta desea pueblo di Aruba un experiencia hopi positivo y unico mañan, na unda e decision di cada un di nos, den nos voto secreto, keda respeta y refleha den e futuro di nos isla tan stima. Dios sigui bendiciona nos pueblo, y cada rincon di nos pais!
