ORANJESTAD (AAN): Diahuebs mainta miembronan di prensa y di diferente instancia y compania na Aruba a wordo invita pa un desayuno na Hilton Aruba Caribbean Resort & Casino, pa despues tambe nan haya un tour pa wak e renovacionnan cu a tuma lugar.
Despues di e dushi desayuno, 2 persona a gana un premio di ‘breakfast for two’ y dos a gana ‘dinner for two’, despues di cual Audrey Wolf y Lily Polsbroek a duna un splicacion di e miyones di dollar na renovacion cu a keda cla aña pasa.
A wordo splica cu Hilton ta keda e cas pa nos localnan, mirando tambe cu e tabata e prome hotel cu Aruba tabata tin(Aruba Caribbean Hotel) y a habri na 1959.
Segun e representantenan di e Hilton, e hotel semper ta cla pa ricibi cualkier evento di compania, famia etc.
Mirando e historia grandi cu e hotel tin, tur caminda na muraya bo ta mira potretnan di antes, cu hendenan cu tabata traha antes, cu e diseñador di e hotel y te hasta un potret di propietario actual di e hotel, ora cu e tabata baby.
A wordo splica tambe cu dos aña pasa e hotel a wordo cumpra pa Hilton y aña pasa e renovacionnan necesario a wordo hasi, unda cu tin un total di 357 camber, cu ta inclui 27 suite.
Segun señora Polsbroek, ta conoci cu e Famia Real ta keda den e hotel ora cu nan ta na Aruba.
El a splica tambe cu e potretnan di antes cu ta colga tur caminda, e hotel a haya atravez di un peticion cu nan a hasi na nan ‘guests’ y ‘repeat guests’ tanto local como turista.
Esnan cu tabata tin potretnan di antes a manda nan pa Hilton y asina a selecta 100 di nan y a traha obranan di arte di nan, cu ta tene e historia di e hotel aki completamente bibo.
Un di e potretnan bunita ta un potret di San Fernando Brothers, cu a cuminza toca den e hotel despues cu el a habri.
