ORANJESTAD (AAN); Sindicato SEPPA a tuma nota di e declaracion den prensa riba asunto di pago di ex-afvloeiiers SETAR, y nan kier a aclarea algun detaye eroneo, cu a wordo declara sin base.
Segun Sindicato, tin diferente aspecto den henter e declaracion aki. Un persona cu en todo caso nos no conoce ta haci declaracionnan, obviamente scucha den un solo banda!
SEPPA ta ripiti cu nan unico interes semper tabata pa e hendenan envolvi haya nan placa cual inhustamente a keda sin worde duna den añanan anterior! Y ya akinan no tabata papia mas di e 32-nan cu ya ta cla caba, pero mas ainda e di dos grupo.
Encuanto statement tabata bay pa SEPPA, nan ta compronde akinan cu lo kiermeen e cobranzanan.
Esaki ta otro berdad, SEPPA a paga tur e cobranzanan cu tabata yega na su porta! SEPPA a haci hopi gasto y Huez a duna e partido cu a gana parti di e proceskosten.
Esaki Huez a dicta caba y pa SEPPA esaki no ta un problema. Kiermeen di ki “conviniencia” ta ser papia akinan?
SEPPA no a pidi nada extra di ningun hende, menos ainda lo hacie di esnan cu si ta SU miembronan. Asina ta esun cu kier papia, wak pa e papia e berdad!
Cu awor of diripiente e Abogado ya no ta nan abogado ta facil bisa, pero tin un vonnis cu ta menciona e mesun Abogado aki como nan abogado.
Al final, SEPPA a paga e gastonan envolvi cerca Abogado Ecury semper y pre-mirando tur e problemanan aki mes cu awendia ta pasando, a bin e decision tambe cu tur cos cu tin di haber cu e asunto aki ta keda den man di e abogado.
Esaki ta un decision cu tur hende mester siña respeta, peor esnan cu nunca a paga ni un cobranza.
SEPPA mescos cu tur esnan cu tin derecho den e caso aki, ta pura pa e asunto aki termina, asina kizas storianan bruha lo por para. Aunke e ta un illusion, ta un speranza.
