Home Cultura Shirma Rouse y Cory Henry & the Funk Apostles lo presenta Diasabra...

Shirma Rouse y Cory Henry & the Funk Apostles lo presenta Diasabra 16 di September durante Caribbean Sea Jazz Festival Aruba

20
0
SHARE
- Advertisement -

ORANJESTAD (AAN)–; Tanto e artista excepcional Shirma Rouse como Cory & the Funk Apostles lo ta algun di e tremendo artistanan musical cu lo presenta durante Caribbean Sea Jazz Festival 2017.

Shirma Rouse lo ta presentando un homenahe digno di e leyenda Aretha Franklin yama “The Queen of Soul”. Shirma Rouse a canta cu e mihornan den e mundo di musica manera : Anouk, Chaka Khan, Michael Bolton y Alain Clark, Ladies of Soul, Orkesta Metropole y hopi otro mas. Cu su participacion fabuloso na “The Voice of Holland” e la sabi di conkista curason di un gran publico.

Shirma Rouse a absorba su talento musical pa medio di osmosis genetico, tur su dos welanan cu tabata musiconan di iglesia, y Shirma a cuminsa canta den su iglesia tempo cu e tabata tin 6 aña di edad.

Na aña 2010 e la lansa su prome CD riba Mercado cu temanan di soul titula “Chocolate Coated Dreams”.  Shirma a lansa 3 album y su di 3 album ta titula “Shout it out Loud”. Cu e album aki e la ser premia na aña 2015 pa “Edison Jazzism Audience Award”. Na Maart di 2017 Shirma Rouse a lansa su di 4 album “Soul Serenade” un bunita tributo na amor, y un duet hunto cu e sensacion di soul americano Ryan Shaw, cu canticanan clasico manera “Imagine” y “Let it be” cu a ser aregla den un forma nobo y innovativo.

Den e temporada di teatro esta durante aña 2012 pa 2013, Shirma Rouse a participa na un tour di teatro tocante e bida di “The Queen of Soul” esta e legendario Aretha Franklin. Despues cu e director artistico di e orkesta Metropole a duna Shirma un dvd di e presentacionnan en bibo di Aretha Franklin na Hulanda, Shirma a keda asina impresiona cu e la dicidi di duna un homenahe na Aretha Franklin tambe paso e aña aki Aretha Franklin lo cumpli 75 aña di edad, y Shirma lo kier celebra su bida y musica riba escenario.

E presentacion lo ta un presentacion musical cu ta duna e publico un bista unico di e bida di Aretha Franklin, un hende muhe, mama y persona Famoso den Soul. Bao guia di un formacion di 8 stem Shirma Rouse lo canta “Think”, “Bridge over troubled Water”, “Respect” y hopi otro temanan favorito. Bale la pena pa bay presencia e cantante aki, al igual cu tur cu ta figura riba e line-up, un berdadero super bon escogencia di artista cu lo bay cay na agrado di tur edad.

Cory Henry naci na aña 1987, ta un organista y pianista di e genero di Jazz Mericano e ta toca musica di alabansa y ta un productor di musica. Cory ta un mucha prodigio, e la toca piano y orgel na un edad di apenas 2 aña di edad, hasiendo su debuto na e legendario Apollo Teatro tempo cu e tabata tin solamente 6 aña di edad.

Su carera musical a cuminsa na ana 2006 y desde e tempo ey e la traha den studio y a bai riba gira cu diferente artistanan, entre otro Yolanda Adams, P. Diddy, Stanley Brown, Israel Houghton, Boyz II Men, Michael McDonald, The Roots y hopi otro mas. Cory a lansa 2 album caba, e prome ta “The First Steps” na ana 2014 y e di 2 ta “The Revival” na aña 2016 y tur dos album a subi riba e lista di Billboard.

For di 2012, Cory tabata un miembro di e asamblea di Jazz y Funk “Snarky Puppy” cu kende e la gana un premio Grammy na aña 2014 pa e Best R&B Performance y na ana 2015 pa e Best Contemporary Instrumental Album.

Actualmente Cory ta riba gira cu The Funk Apostles y a hasi un presentacion den “The Tonight Show with Jimmy Fallon”. The Funk Apostles ta Cory su pasion y su Proyecto mas recien, consisti pa algun di e miho musiconan, escohi personalmente pa duna bida nobo na su conceptonan musical.  Su carisma a cosecha miyones di views riba Youtube y otro plataformanan social. E proximo album titula “Cory Henry & the Funk Apostles” ta exhibi su talento vocal y ta destaca e sonido nobo y vibracion cu e kier innova pa mundo.

No perde e oportunidad pa mira y scucha e gran presentacion di Shirma Rouse y Cory Henry & The Funk Apostles riba Diasabra 16 di September na Renaissance Festival Plaza den Caribbean Sea Jazz Festival. Pasa busca bo ticket na prijs di benta adelanta na Superfood, Casibari Music Café, Plaza Bookshop, Citgo O’stad, Citgo Essoville, Citgo Noord, Red Sails Sports, The Market at Alhambra, De Palm Tours Desks y Caribbeanseajazz.com

 

 

 

 

- Advertisement -

DUNA COMENTARIO

Please enter your comment!
Please enter your name here