Habitantenan kier conserva tur esaki!
ORANJESTAD (AAN): Habitantenan rond di Sero Cristal ta furioso! Awor cu a bin haya sa cu tin mas destruccion andando, nan a dicidi na tuma accion.
Tabata Diaranzon pa 6:00 pm cu e habitantenan a tene un reunion na un cas na Cristal, y tabata habri pa tur habitante di Babijn, Marawiel, Cristal, Koeriboeri y otronan cu kier yuda conserva e area di Cristal.
E vocero Luis Irausquin, ta parti di directiva di Fundacion Conserva Area Cristal na Paradera. E ta un fundacion recien lanta, y ta conta cu directiva y miembronan sostenedor cu ta hende cu ta biba den e area aki. Tambe tin e area stipula den statuto, unda cu e bisiñanan ta uni pa yega na e punto pa conserva naturaleza y para e desaroyo cu nan ta mirando ta tumando lugar.
Nan meta primordial ta pa defende naturaleza, cu nan ta desea pa futuro generacion ta parti di dje y conserve. Tambe e meta ta pa evita cu mas destruccion por sigui tuma lugar eynan, pa minimaliza e destruccion di naturaleza cu ya caba ta poco y no por permiti nos mes di laga naturaleza wordo afecta y destrui di e forma aki.
Den e mundo moderno, nos tur mester ta conciente di naturaleza cu tin rond di nos. Animalnan tin habitat den naturaleza, y ser humano tambe tin mester di naturaleza! Pesey e grupo di habitante, kier conserva Sero Cristal pa asina tur hende por hala rosea puro den naturaleza, y aprecia naturaleza.
Con e destruccion a start? Habitantenan a bisa cu e destruccion cu a ser mira for di algun tempo caba ta cobando mas pariba, pa bende santo. Pero e compania a keda coba, sigui traha buraco, te cu awor a coba yega te bao di nivel di lama. E santo ey ta contamina cu salo (“salt”) tambe.
Awor diripiente na 2017 a mira desaroyo unda un Fabrica di Cement a yega y habri eynan. Ta mezcla e santo salo, cu cement importa di paisnan bisiña, y anochi ta trece saco di cement, usa awa, y ta transporta e cement pa refineria. E ta un compania nobo di stranhero cu a establece su mes aki. Ki efecto cement cu salo lo por tin?
E companianan no ta ni worry cu e habitantenan. Pesey no tin ningun comunicacion di e compania cu habitante.
E otro preocupacion cu tin ta banda pabao di Sero Cristal, unda pa hopi tempo caba no tabatin cobamento mas, y el a bira un lugar di Deporte di Pelea di Gai, te cu esey a stop.
Awor diripiente na 2017, ata eynan a cuminza traha bek cu heavy equipment, y a cuminza coba atrobe. Y for di caminda grandi mes, pueblo por mira kico ta pasando eynan cu destruccion di naturaleza.
E ta wordo coba den forma acelera y por bira con poco poco e sero ta wordo elimina, y lo no existi mas. Tur e destruccion di patrimonio di Aruba… djis pa haya material pa entrega material pa cierto proyectonan?
