Pueblo ta puntra:
ORANJESTAD (AAN) – For di comunidad tin cierto critica den direccion di tanto Minister Mike de Meza como Minister Dowers, den sentido cu di un banda nan ta papia di e posibilidad di acerca MEP wak ki programa nan por ofrece cu AVP por bay di acuerdo, anto pa nan uni forza y forma un gobierno di base amplio di 12 asiento.
Pero di otro banda nan a haci criticanan masha pisa contra MEP, siendo cu cantidad di hende na Aruba ta culpa ambos di a endeuda Aruba. Anto con bo kier forma un gobierno cu un partido di cual cosnan malo so bo por papia di dje? Cu cual confianza nan por sinta goberna? Esaki sin tene cuenta e halamento di ciboyo cu lo surgi ora di dicidi ta ken ta bira Prome Minister.
E lo por ta un gobierno cu un base di 18 asiento, sigur cu si, pero si e confianza no tey, y cada bez nan ta corda otro kico a bay den su gobierno, sin reconoce e propio foutnan, sin tin e humildad di bira auto critico, ta ki sorto di gobierno esey lo ta anto?
Aunke cu diferente persona no ta mucho contento cu un coalicion cu un base debil, si ta asina cu hopi ta pensa cu mester duna nan e oportunidad di goberna y mustra cu enberdad nan tin Aruba na pecho y cu nan ta capacita pa eherce e maneho, of pa bin cu e opcion di un Zakenkabinet cu ta esun cu no poco hende ta braza como esun di mas conveniente pa nos pais, e momentonan aki.
