Segun Ryan Peterson di Banco Central
ORANJESTAD (AAN): Ryan Peterson di Banco Central a expresa varios punto riba e situacion di innovacion. Bayendo un tiki mas profundo riba e tema di innovacion den sector financiero y sector bancario, ultimo dos decada por lo menos, nos por mira cu tin evolucion den servicionan financiero, e asina yama tecnologianan financiero of Fintech.
E cambio riba su mes no ta nada nobo. Unico diferencia ta, compara cu un dies aña pasa cu e rapides di e cambio y desaroyonan, innovacion den e tecnologia, ta bayendo mas y mas lihe, unda bo ta wak cu tin dos forsa cu ta basicamente influencia e innovacion ey. Di un banda bo ta wak tecnologia digital ta push e innovacion ey y di un otro banda bo ta mira un mercado, un consumidor cu tambe kier productonan nobo, cu tambe kier servicionan nobo, cu no kier warda den rij, te ora e haya su servicio nobo.
Tecnologia ta push e innovacion ey, pero di otro banda e generacion nobo, esta millennials, y tambe consumidornan cu kier servicionan mas rapido y mas bara y mas lihe. Un ehempel di esaki ta, por ehempel na Hulanda por mira un sistema, un sector financiero cu ta mucho mas specialisa, bo ta mira companianan hoben, chikito, cu ta lantando, Fintech startups, cu ta crea un gama di producto y servicionan nobo cu ta wordo ofreci 100% digital.
Di un banda bo ta mira specialisacion y di un otro banda bo ta mira cu nan ta uzando plataformanan digital, unda cu e productonan no ta fisicamente mas, unda cu un cliente por habri un cuenta na banco digitalmente. Esaki ta cambiando nos sector financiero mundialmente. No ta solamente Hulanda, pero mundialmente bo ta mira esaki y den Caribe. Paulatinamente ta mira e desaroyo aki tambe.
E pregunta sinembargo ta keda unda Aruba ta para den innovacion digital. Y pa por contesta esaki, Banco Central a lansa e investigacion “Isla Innovativo”. Si mira ultimo decada aki na Aruba, innovacion digital ta acelerando cu impactonan riba comercio, comunidad y economia.
Adopcion y uzo di tecnologianan digital no ta nobo, manera ya menciona. Por mira cu den añanan 90, Internet a cuminsa. Por a mira den e añanan 2010, por a mira e-commerce ta cuminsa pickup y awendia bo ta mira un di tres ola den innovacion ey, unda cu e smartphone, m-commerce, ta hungando un rol hopi mas importante compara cu un 10 pa 15 aña pasa.
Si mira tur e tecnologianan aki y nan porcentahe di penetracion den e nos comunidad, bo por mira un smartphone internet social media, Facebook, etc. Un penetracion basta halto den nos comunidad. Di un otro banda ta mira tambe e-commerce, mobile payments y cryptocurrency ta un siguiente ola di innovacion cu un penetracion menos cu ainda mester yega na un cierto nivel di adopcion y uzo den comunidad.
