ORANJESTAD (AAN): Diadomingo, 22 di October, Fundacion Muchila Creativo a organiza un open dag
‘Arts Infusion’ na Cumana 71 (Oduber Golden Palace) na su dependance nobo.
E evento aki a ser organiza en conexion cu e luna di enseñansa. Alavez el a duna e comunidad di Aruba e oportunidad pa cera conoci cu e luga nobo y tambe por a participa na diferente actividadnan di arte y por a saboria di snacks y diferente sopi, cu a cay na agrado di un y tur.
Como ‘highlight’ den nos programa tabatin un charla di remedi tera. E publico tabata bao impresion di e gran balor di remedi tera y con e por tin un efecto positivo riba nos salud.
Na final di dia un y tur por a participa cu nan talento musical cu karaoke.
Hopi hende a probecha pa canta nan canticanan faborito cu apoyo y sosten di aplauso di e publico.
Directiva di Muchila Creativo kier gradici (Directie Cultuur) DCA y Andina Ice pa nan sosten. Tambe un danki di curason na tur esnan cu a yuda y haci e open dag ‘Arts Infusion’ posibel.
Esnan cu ainda no a haya e oportunidad pa admira nos centro di terapia di arte por pasa cerca nos desde luna di November venidero riba dialuna, diaranzon y diabierna atardi entre 4’or y 7’or p.m.
Tambe por haci cita na nos email terapiacreativo@gmail.com
Den luna di November Muchila Creativo lo cuminsa cu un produccion teatral pa mucha y hoben. Si bo tin interes pa actua, canta y baila den un obra musical, bo por mail nos of yama pa mas informacion. Tambe nos ta ofrece diferente tayernan di terapia di arte. No perde e oportunidad aki. Cupo ta limita!
