ORANJESTAD (AAN): Dialuna merdia pa 12:30 pm, e chauffeur fememino di un Porsche Cayenne SUV color preto cu number A-6575 a scapa milagrosamente di un desgracia, na momento cu e ta para na e T-weg di Shaba cu ta bay Bubali.
Ta na momento cu un e truck carga cu cement y santo mezcla, a bay lora cu tiki velocidad na e cruzada net panort di Do-It Center, pa bay pabao.
E ‘momentum’ di e birada y velocidad, a pone cu e wielnan banda drechi di e truck a cuminza bay halto, y finalmente a djis kentel full produciendo un sonido enorme.. y a e vehiculo pisa a hasta keda lastra bay direccion pabao.
E truck di marca Daf cu number DT-1070 a cay na e otro banda di caminda unda cu na varios ocasion sa tin basta auto ta staciona. Bon mes cu e momento ey e tabata bashi. Si acaso tabata como mey ora mas laat, e pida caminda aki lo ta yen di auto cu muchanan di scol.
Debi na e kentelmento, cantidad di cement y santo a spat, y cay riba e Porsche Cayenne. Awa cu tabatin den e truck tambe a basha afo.
E chauffeur femenino di e Porsche a sali ileso, pero a keda spanta. Su vehiculo a djis ricibi daño di cement. Si acaso e tabata un tiki mas pabao, e vehiculo por a hasta wordo placha.
Hopi cement a keda benta abao tambe. A core busca personal y heavy equipment pa recoge tur cu loke tin eybao, y vehiculo pisa pa asina yuda pone e truck bek riba su diesdos wielnan.
Ambulance tambe a presenta, unda Paramedico a haci control na e chauffeur di e truck, como cu e tabatin dolor na su braza.
