ORANJESTAD (AAN): E control di autoridad riba trafico na Aruba, a sigui den fin di siman cu a pasa.
Diasabra anochi polis di Distrito di Noord tabata tin un control grandi di trafico. Diasabra for di 9:00 pm, te cu 12:30 am di Diadomingo madruga, nan a tene control.
Nan a haci esaki riba Sasakiweg unda antes tabata tin “Different Bar Restaurant”. Ey a haci e control di trafico.
Mas cu 10 agente policial a para en total 218 vehiculo di motor, y vocero policial a confirma na DIARIO cu en total 85 boet a worde parti den 3 ora y mey.
Loke cu mas a worde encontra ta cu tabatin 9 vehiculo sin plachi number. Tambe 9 persona tras di stuur sin rijbewijs.
Tambe a gara 3 hende coriendo sin seatbelt bisti. Tambe a haya 45 vehiculo coriendo sin Keuringskaart.
Fuera di esey, a haya 10 persona coriendo cu nan nummerplaat belasting no ta paga, y tambe a haya 3 coriendo sin cu nan Aseguro di Auto ta na ordo.
DIARIO a haya sa cu durante e control tambe a detene 2 persona.
Un persona a worde deteni pa droga y otro persona pa core bou influencia di alcohol.
Dos auto a worde getakel pa incumplimento di e documentonan necesario y tambe un auto cu a worde tuma den beslag pa investigacion tocante droga.
Cuerpo Policial Aruba lo sigui haci diferente tipo di control rond di e isla, pues chauffeurnan tin di ta conciente pa tin bo documentonan na ordo durante un control y tambe pa bisti bo faha di seguridad den tur momento esaki ta pa bo propio seguridad.
