Home Editorial EDITORIAL: Dios bendiciona nos pais y cu Aña 2018 trece pa nos...

EDITORIAL: Dios bendiciona nos pais y cu Aña 2018 trece pa nos tur, mihor expectativanan!

639
0
SHARE
- Advertisement -

Nos ta hopi cerca di dispidi di Aña 2017 cu nos bista fiha den e nacemento di Aña 2018 cu ta mustra un aña cu lo cuminza cu hopi reto pa Aruba. Retonan pa Gobierno, retonan pa e sector comercial, retonan pa nos como comunidad.

Nos ta laga atras un aña cu tambe a inicia cu hopi expectativa, cuminzando cu e hecho cu e tabata un Aña di Eleccion cu a trece cune un resultado inespera, kizas pa un mayoria di nos pueblo, y spera y hasta desea tambe pa un cantidad grandi di nos ciudadanonan.

Un campaña politico cu, na mi opinion, no tabata di gaba, pero na cual cada partido y e votadornan tur a sobrebibi na dje, sin ningun desenlace negativo, pero cu sin duda a laga un sabor amarga pa tur esnan cu a spera e triunfo total, y aki mi ta referi na tanto e partido cu a baha for di gobierno y esun cu aworaki ta den gobierno formando un coalicion.

Un coalicion cu ta bisto cu tin hopi challenge su dilanti, pa saca a flote nos finanzanan publico, aclarea e situacion di Citgo den cual nos comunidad a pone asina hopi speranza pa tur loke e ta nifica riba tereno economico-financiero y laboral. Fuera di e aspectonan politico y di maneho cu sin duda lo ta un trabao inmenso, ta bin e aspecto social cu e gobierno actual ta considere den CRISIS. Un crisis cu tabata tey caba, cu tin añanan dunando señal, y cu honestamente bisa no ta un crisis cu solamente un gobierno mester a, of bay resolve.

Si nos ta honesto, y dispuesto pa wak e realidad, y no mira e crisis social como un producto exclusivo di pobreza, of di falta di maneho di cual gobierno cu a sinta, nos mester admiti cu e scale di valornan den nos sociedad a baha y hopi, cuminzando den nos mesun hogarnan. Consumo di droga y alcoholismo ta bisto cu ta parti serio di e problema. Nos bida spiritual cu sin duda ta importante a bay atras, mientras cu materialismo a lanta cabes.

Cu mester drecha e oportunidadnan di empleo pa nos hendenan ta un hecho. Cu na Aruba tin hopi hende cu ta biba cu menos di salario minimo, CBS a demostra esaki no awor pero for di tempo bieu. Pero e desventahanan aki no mester, obligatoriamente, ta mara na criminalidad, abuso di mucha, na actonan manera a sosode cu e caso di e dos criaturanan cu a solidariza nos pueblo bao un impacto espantoso, cu algo asina no por sosode mas den nos pais.

Nos tur sin duda tin nos wowo poni riba e gobierno nobo. Pero ban ta conciente cu gran parti di e solucion ta den nos mes. Den cada persona, den cada hogar, den cada consenshi. Den organiza nos mes mihor cu nos presupuesto, cu nos actitud, nos decisionnan, nos manera di anda cu nos famia y nos semehantenan.  Den un solo palabra cu nos RESPONSABILIDAD como individuo y como ciudadano. Nos compromiso cu nos pais!

Dios bendiciona nos pais y cu Aña 2018 trece pa nos tur, mihor expectativanan! Ta mi deseonan y di henter e personal di Matutino DIARIO, e matutino di nos Pueblo Arubano.

 

 

 

 

- Advertisement -

DUNA COMENTARIO

Please enter your comment!
Please enter your name here