ORANJESTAD(AAN)– – Aña 2017 ta yegando su fin y cu esaki e fiestanan ta cuminsa. E parandanan cu pagara y tur locual ta e tradicion Arubiano. Den tur e festividad aki cu nos ta custumbra cu n’e toch ta importante pa tene cuenta cu otro. Hopi di nos no por sin nos pagara di fin aña y claro e musica no por falta. Sin embargo mester corda si riba esnan cu ta biba cu un of otro condición di salud y esnan cu ta desea di disfruta di nan trankilidad.
Nos mester ta bon ciudadano pa guia nos hobennan y nos yiunan pa tene cuenta cu hendenan grandi y tambe cu e chikitinnan cu por tin miedo di zonido duro. Zonido duro ta molestia, ta causa daño na nos oido y te hasta por afecta nos salud.
Estudionan na diferente país a demostra cu exceso di zonido ta causa perdida di oido, por contribui na presion halto, problema di respiracion, aumento di tension muscular, y hasta algun medico ta di opinion cu exceso di zonido por ta un factor di riesgo mas halto cu colesterol. Mester tene cuenta si cu pa un zonido produci perdida di oído e sonido mester ta pa 8 ora largo na 85 decibel.
Tambe exceso di zonido por causa disturbio di soño. Algun hende ya por tin molester ora cu un sonido ta na 60decibel, esaki ta ora un persona ta papia hopi duro. Ta un hecho cu nos profundidad di soño ta wordo afecta negativamente door di desordo. Pa nos por tin un soño optimal mester tin un nivel di zonido bou di 40 dB. Insuficiente soño por conduci na nerviosidad y ta baha nos capacidad di competencia.
Den e dianan aki ta importante pa nos para keto y pensa con nos por aporta na e bon salud di nos tur.
Stichting ter Bestrijding van Geluidsoverlast (SBG) ta un fundacion non-profit cu tin como meta concientisacion, prevencion y combatimento di zonido excesivo na Aruba. SBG ta informa publico en general di e efecto y daño causa pa zonido excesivo y ta duna guia y conseho na esnan cu ta afecta door di zonido excesivo. Teniendo cuenta cu otro sin abusa di zonido nos por biba den harmonia y evita stress.
