Presidente di Staten:
ORANJESTAD (AAN) — E logo di Shoco ya no ta den Sala di Parlamento, pasobra despues cu a haci un estudio a bin saca afo cu Staten mester uza escudo di su pais y e logo ta bira un simbolo pa Parlamento di Aruba, segun presidente Sr. Juan (Ady) Thijsen.
E decision a wordo tuma prome cu Sr. Thijsen a bira Presidente di Parlamento y esaki a bay via un Comision Central. A keda dicidi cu e escudo ta bay bek den Sala, y cu e shoco ta keda riba e letterhead y logo den e portanan di Parlamento.
Sr. Thijsen a splica cu tin un diferencia entre escudo y logo. Bo escudo no ta bo logo. “E logo ta pone cu nan ta reconoce cu esey ta e logo di parlamento di Aruba. Pakico a pone e escudo bek? Esaki ta pa motibo cu nos a bay haci un investigacion con den e otro paisnan esaki ta, y mayoria di nan, tin e escudo. Tin di nan tin tur dos”. Y a base di esey a dicidi di bin bek cu e escudo, ya cu esey ta e mayoria a scoge. Tin diferencia di opinion, cual ta algo sano.
“Tempo cu MEP Tabata den oposicion, e partido den gobierno tabata kier e logo. Pero awo cu mayoria a cambia, e mayoria a scoge pa e escudo. Esey ta democracia”, Presidente di Staten a reitera.
