ORANJESTAD(AAN)— Riba diasabra, Januari 20, e Sanctuario di Burico lo organisa su di 13 caminata anual pa recauda fondo pa e buriconan.
Caminata, cu pa awor ta algo acostrumbado. Hunto cu e buriconan Diva, Simba y Igor, tur participante jong of bieu por kana, jog of core door di Aruba su bunita paisahe. E distancia lo ta 5km y lo bo keda encanta cu e ruta.
E caminata lo cuminsa na e Sanctuario di Burico nobo na Bringamosa. For di eynan participantenan lo pasa door di Boton, Jan Flemming, Rooi Francis y bek pa Bringamosa.
Den e ruta lo bay tin varios stop pa awa y na final tur por goza di dushie fruta fresco di nos sponsor di semper Superfood.
Tur participante lo ricibi un bunita regalo cortesia di Matthews Restaurant.
E caminata lo cuminsa pa 5or atardie y bo por registra for di 4 or na e Sanctuario di Burico.
Pa solamente fls. 10.00 bo por tene bo curpa den condicion y alavez aporta na e 130 buriconan bibando den e Sanctuario.
Pa mas informacion bo por yama 593-2933. Nos lo keda contento di tende dibo!!
