ORANJESTAD (AAN): “Mi ta papia aki pa bienestar y pa bida di mi propio yiu, cu tambe ta alumno di La Salle College,” un mayor a comenta riba Diaranzon na DIARIO. “Ami y algun mayor riba Diamars a keda babuca pa e informe cu nan a haya un alumno cu cuchiu scondi den su tas, y mesora nos a pensa riba loke a pasa luna pasa na Florida”.
E mayor ta referi na e caso di asesinato di 17 alumno na un scol cerca di Fort Lauderdale.
“Spera cu La Salle College no tuma nos na malo… echt niet. Nos ta contento cu nan a atrapa e hoben cu e cuchiu, pues nan a salba tur alumno inocente cu por a haya nan morto inespera for di man di e hoben aki.”
“Pesey nos ta kere, cu e hoben cu cuchiu aki no merece di keda mas na La Salle College MAVO. Nos yiunan no ta sinti nan mes safe mas na e scol si acaso e hoben aki sigui haya les mey-mey di nan”.
E mayornan a bisa cu nan ta deliberando si acaso nan lo bay busca sosten di mas hoben, of si nan ta bay directo pa Directornan, of kizas hasta cerca Ministro di Enseñanza encuanto e asunto aki.
Awendia, un alumno haya cu arma, sea di candela of cuchiu, ta un motibo grandi pa alarma tur hende! Djis mira na Florida mes, cuanto ‘red flag’ a haya di e hoben asesino pero tog a ignora esaki.
Kico e mayornan ta pensa riba posible rehabilitacion di e hoben gara cu cuchiu na e scol na Playa? E contesta ta: “Nos ta spera e por rehabilita, pero por fabor, no haci esey na scol mes mey-mey di e demas alumnonan.”
Nan ta spera cu La Salle College no ignora e red flag aki.
