ORANJESTAD (AAN): Recientemente e empleadonan femenino di Aruba Marriott Resort & Stellaris Casino, Marriott’s Aruba Ocean Club, Marriott’s Aruba Surf Club y The Ritz-Carlton, Aruba a worde invita pa atende un evento special ‘Stand Strong, Stand Tall’ den honor di dia internacional di hende muher 2018.
E evento a tuma lugar den Grand Ballroom cual tabata bunita decora y unda tambe e empleadonan a disfruta di un dushi lunch sigui pa un seminario cu oradornan principal Señora Evelyne Wever-Croes – Minister President di Aruba, Señora Enrita Werleman – Trahado Social, Cofundadora di Mary Joan Foundation y Fundadora di BOB, Srta. Alejandra Vallejo – Medico di Salud y e presentadora tabata Srta. Rosabelle Illes.
Cada orador a duna conseho y recomedacion na e empleadonan femenino tocante maneho di un carera exitoso, mantenshon di un bida balansa y saludable, con pa haci examen di pecho na cas, kico ta e sintomanan di cancer di pechi como tambe maneranan pa preveni cancer di pecho.
Aruba Marriott a organiza e evento bunita aki como parti di Marriott International su esfuersonan pa celebra logronan di igualdad di genero como tambe empowerment di hende muher rond di mundo y alaves crea concientisacion rond di cuestionnan cu ta eleva hende muher na un nivel mundial.
Marriott su ‘Women’s Leadership Development Program’ a worde introduce na 1999 cu obhetivonan pa aumenta e presencia di hende muher den puestonan clave, mehora e proceso pa hende muhernan por desaroya un carera na Marriott, desaroya un rol pa gerencia yega na asegura e progreso di hende muhernan y pa capitalisa riba e suministro di lidernan femenino actualmente disponibel pa pusha e exito di e organizacion.
