ORANJESTAD(AAN) Mañan, diahuebs 8 di Maart 2018, ta Dia Internacional di Hende Muhe, pa cual CEDEHEM ta organisa un evento special pa e dia aki. Sra. Milangela Ras, a splica mas di e evento aki.
E dia aki, e hende muhe por bin cu su ruman, su casa.
CEDEHEM nunca a exclui e ser masculino, y nan ta para pa tur genero. E ta un empowerment carousel, caminda e invitado lo yega, e lo haya un palabra di bon bini di parti di e directora. Segun tin entendi, e dia aki tambe lo conta cu e presencia di nos prome minister, Sra. Evelyn Wever- Croes y tambe Minister di Finanzas, Asuntonan Economico y Cultura, mr. Xiomara Ruiz- Maduro.
E invitado lo scucha dos of tres testimonio di hendenan cu CEDEHEM a nifica algo pa nan y despues nan lo drenta e edificio, caminda cu e colaborador principal, L’oreal, Romar Trading lo tin t’ey presente tambe.
Cada invitado lo por drenta den p.e. e huki di creatividad, nan por beauty & make up. Den e di dos piso nan por pasa tambe pa loke ta salud. Tin tambe un persona cu lo duna reflexologia, tipsnan. CEDEHEM ta conta cu e presencia di Sr. Rene Wild cu lo duna tips di salud y training, cu ta importante, ya cu e hende muhe ta duna di su mes na su famia y lubidando ariba su mes. Loke CEDEHEM kier ta pa e hende muhe pensa riba su mes tambe, segun Sra. Milangela Ras.
Pa registracion, pa CEDEHM tin un bista di cuanto invitadonan por spera, Sra. Ras a duna su number di telefon pa por registra, cual ta 565- 5424. Pero si un persona no a logra registra of yama, pero kier bin toch, esaki ta completamente gratis, tur hende lo ta bon bini.
Pa mas informacion adicional, por yama e liña directo cu ta 588-1391.
