Remitido
Min.Pres. /Vision di Gobierno di Aruba/solo di pueblo 20 febr.2018, pag.13. Den e articulo aki Minister Presidente di Aruba ta menciona bon cla cu Gobierno ta habri caminda pa , den cuadro di trabaonan riba tereno di Integridad, Corsow y Boneiro worde envolvi y te hasta bin haci investigacion riba Aruba.
Pa pueblo sa y corda bon : Boneiro no ta e Boneiro di antes mas , Boneiro no ta e isla di antes parti di Antiyanan hulandes (ruman di Aruba manera antes) ; no , awor aki Boneiro ta nada mas y nada menos cu un parti di e teritorio di e pais Hulanda. No bruha, Boneiro no ta un partner igual na pais Aruba den Reino hulandes sino Boneiro ta un parti integral di e pais Hulanda den Reino hulandes. Boneiro ta Hulanda!
Pakico pone enfasis riba e posicion di Boneiro en comparacion cu Aruba ? Pasobra Boneiro como parti di e pais Hulanda den Reino hulandes awor aki ta worde domina pa hulandesnan europeo cu ta dicidi riba Boneiro pa tur e Bonerianonan original.
Habriendo caminda pa Boneiro por funciona y investiga nan Aruba ta mescos cu habri caminda pa Hulandesnan europeo bin mete na Aruba tambe. No ta MEP a grita cu Aruba a perde autonomia ora CAFT a tuma over e control riba finanzas di Aruba? Ta ken ta manda den CAFT ? No ta un representante Hulandes europeo di Reino hulandes y un Hulandes europeo di e pais Hulanda y pa aparenta pa Aruba un Hulandes arubiano? Pues no ta dos contra uno? MEP ta bay cambia e situacion den CAFT di dos contra uno pa uno contra uno of pa tin mas balance ta bay cambia e representante di e pais Hulanda pa un representante di e Pais Corsow ?
Anto awor MEP ta habri caminda pa un representante di e pais Hulanda , bao capa di Boneiro, ta bin mete cu asuntonan interno di Aruba?
Unda Rudy Croes( MEPISTA ?) ta keda cu su comentario ?
Cu ta pidi e pais Hulanda conseho riba e tereno aki no ta nada malo , pero pa duna e pais Hulanda entrada den algo interno di Aruba si ta algo di desaproba siguiendo e critica di MEP riba perdemento di autonomia di Aruba den caso di CAFT.
Por fabor Minister Presidente reconsidera e pensamento di laga pais Hulanda mete cu cosnan interno di Aruba.
