Home Comentario Un episodio decisivo den e lucha pa nos Status Aparte Introduccion ...

Un episodio decisivo den e lucha pa nos Status Aparte Introduccion (Fin)

9
0
SHARE
- Advertisement -

Remitido:

Den e articulo aki, Mario Enrique Croes ta recapitula un episodio cu e ta considera decisivo pa e lucha pa nos Status Aparte.Ta trata e periodo entre februari 1981 ora cu e prome sesion di e Conferencia di Mesa Rondo a tuma lugar y september 1981 ora e partido MEP a sali for di e kabinete Martina.

Den parti 2 di e relato di 3 parti aki, a keda diasabra ultimo na e punto di bista di Leo Chance cu Isla Ariba no kier bay Bruselas . Nan a bin Den Haag y nan kier keda Den Haag. Y si ta Bruselas tin cu bay toch, anto e ora nan lo mester mara nan na e trein, segun e palabranan di Chance.

E representante di Saba, Will Johnson, e ora ta puntra Van der Stee si un retour Den Haag tambe ta posibel. Van der Stee ta responde afirmativo. Representante Laurens di Curaçao siguientemente ta declara cu Brussel no mester significa necesariamente independencia. E contesta di Van der Stee tabata cu ora e di dos sesion termina, esey no kier men cu e situacion existente lo keda eternamente asina.

Importante pa menciona ta cu e partido mayoritario di Aruba, esta MEP, den un reunion anterior di GTR na Sint Maarten a bay di acuerdo pa no modifica e Statuut durante e fase transitorio y cu esaki a exclui un Status Aparte pa Aruba durante e fase transitorio. AVP (Henny Eman nieto) y RUBA (Watty Vos) a opone fuertemente contra di esaki y a recorda Betico Croes esaki constantemente durante e prome sesion di e Conferencia di Mesa Rondo.

Den su discurso na e apertura oficial di e Conferencia di Mesa Rondo, Don Martina den su calidad di Prome Ministro di Antiyas a haci un intento claro pa pospone e di dos sesion indefinitivamente. el a participa na e presentenan cu ningun decision por cai den e di dos session di e CMR tanten e pueblonan di e islanan, cu e excepcion di Aruba, no a worde informa y conseha debidamente.

E delegacion di Aruba a opone fuertemente contra di e ponencia ey pasobra esey lo nifica cu e destino di Aruba lo depende di decisionan cu mester tuma luga riba e otro islanan. E debatenan tocante e posicion di Aruba a culmina den un (anti)climax durante e di 13 y ultimo reunion. E delegacion Arubiano (MEP, AVP y RUBA) den su totalidad tabata di opinion cu den acuerdonan mester menciona cu e derecho di autodeterminacion di Aruba mester por desemboca despues di e fase transitorio den un independencia conecta pa medio di un relacion internacional cu e otro islanan y un sorto di relacion di gemenebest/commonwealth cu Hulanda.

Y ademas cu Hulanda den e caso ey lo duna garantianan tokante e defensa militar, e reconocimento internacional y e ayudo pa desaroyo. E delegacion Arubiano no kier a drenta un fase transitorio sin haya e garantia cu Aruba lo haya su independencia despues. Pa tal motibo nan tabata exigi di Hulanda garantianan pa e independencia politico y integridad territorial.

Independencia pa medio di un “voetnoot”:

Van der Stee y e miembronan di e delegacion Hulandes, a reacciona cu presion pisa riba e delegacion Arubiano pa laga e exigencianan ey cai. Van der Stee a argumenta cu si acepta e acuerdonan ey, esey lo nifica cu e conferencia ta bay di acuerdo cu Aruba mester sali. Aruba lo no tin e libertad mas pa despues bisa ‘no’ y forma parti otrobe di Reino.

Segun Van der Stee esey lo ta un paso cu peliger di morto pa Aruba. E minister Hulandes no tabata dispuesto den e caso ey pa sigura e integridad teritorial pasobra Hulanda no por permiti su mes di duna un ‘cheque blanco’ mirando e inquietud politico y instabilidad den e region Caribense. E garantianan ey mester worde delibera cu e paisnan den region. E delegacion Arubiano na e momento ey a pidi pa un schorsing pa consulta internamente kico pa haci.

Pero prome cu e delegacion Arubiano a sali for di e sala di conferencia e miembro di e delegacion Hulandes, Gritter, a tuma palabra y a duna Betico Croes e siguiente mensahe pa ora e consulta cu su delegacion. el a declara cu en caso bira asina cu e resultado di e Conferencia di Mesa Rondo no duna e resultado cu ta brinda un perspectiva ariba un relacion di cooperacion estrecho y duradero entre e seis islanan, esey lo trece cu n’e cu actitud di Hulanda por cambia drasticamente.

Segun e declaracionan di Watty Vos y Henny Eman na final di e prome sesion di e Conferencia di Mesa Rondo, durante e schorsing e miembronan di e delegacion Arubiano a yega unanimamente na e conclucion cu Hulanda ta bluff y cu nan lo ‘call e bluff’. Grandi tabata nan sorpresa ora cu e reunion a reanuda Betico Croes no a haci esey. For di e momento ey e tres partidonan MEP, AVP y Ruba no a presenta nan mes mas manera un solo delegacion y Betico Croes tabata hiba palabra solamente na nomber di e partido mas grandi, esta MEP.

Como concesion Van der Stee a propone na e lider di e delegacion Arubiano, cu e ta dispuesto pa tuma su exihencianan manera voetnoot den e acuerdonan. Claro ta cu un voetnoot no ta un acuerdo y asina a sosode cu despues di e prome sesion di e Conferencia di Mesa Rondo e partidonan RUBA y AVP a ridiculisa e logro di Betico Croes como independencia pa medio di voetnoot. Despues di e reunion Henny Eman a declara cu e lucha Arubiano na e momento ey ta menos leuw cu na 1948 ora cu nan a reconoce e derecho di Aruba pa sali for di e constelacion Antiyano y ta solamente mester a studia e asunto. Awor, na e momento ey, nan a reconoce e derecho di auto-determinacion pero Betico Croes a mara nos pa 10 aña sin garantia, segun e palabranan di Henny Eman.

Por deduci for di e relato stenografico cu e motibo di con Betico Croes no a persisti, tabata cu e riesgonan tabata mucho grandi mirando e posicion geo-politico vulnerabel di Aruba. Nos ta carga e responsabilidad, asina Betico Croes a bisa despues di e schorsing referiendo na e hecho cu e partidonan di oposicion cu por permiti nan mes di haci politica partidario pero e no por permiti su mes e luho ey.

Un fracaso inminente:

Betico Croes a regresa man bashi Aruba y e sentencia di oposicion no a conoce pordon: traicion na e causa. Den prome instancia, e lider di MEP kier a organiza un referendum pero ora el a ripara cu e no lo logra pa haya sosten pa e resultadonan, el a pone e idea un banda.

E lider Arubiano tabata tranca den un logica cu tabata forma parti di su mesun tactica: blof y menaza a hink’e den un caya sin salida ora Hulanda a rete pa haci Aruba independiente. Y e perspectivanan tabata mustra pio ainda pasobra e di dos sesion di e Conferencia di Mesa Rondo cu a tuma lugar despues di eleccionnan parlamentario Hulandes dia 26 di mei 1981, a confirma e acuerdonan di e prome session. Esey a blokea pareu tur salida.

E situacion mester a bira insoportable pasobra na april 1981 caba Betico Croes ta informa e politiconan Hulandes cu e periodo transitorio mester bira mas cortico y cu Aruba kier haci uso di e derechonan di auto-determinacion na 1986. Hulanda logicamente ta rechasa e proposicion aki basando su mes riba e acuerdonan di e prome sesion di e Conferencia di Mesa Rondo.

Como gesto na Betico Croes, Van der Stee a avisa Curaçao pa stop di retrasa e proceso di decentralisacion. E fracaso di e lucha Arubiano tabata inminente. Durante e prome sesion di e Conferencia di Mesa Rondo tabata evidente cu Aruba tabata para su so.  No obstante cu e fracaso tabata casi sigur Betico Croes no a rindi. Y den esey el a bay buska sosten serka esnan cu a manifesta nan mes contra di lucha di Aruba y di cual un sosten den prome instancia tabata parse improbabel: e otro islanan di Antias.

E anulacion di e acuerdonan:

E ironia di e henter e episodio aki ta cu e Hulandesnan mes ta esnan cu a ofrece Betico Croes e salida pa libra su mes di e acuerdonan di e prome session di Conferencia di Mesa Rondo.

E coalicion nobo di gobierno Hulandes, CDA, PvdA y D’66 a basha abou riba 19 di augustus 1981, apenas 5 siman despues di a worde forma, pa motibo di desacoerdo tocante e medidanan di austeridad. Y “sorpresivamente” algun dia despues riba 1 di september e coalicion di kabinete Martina ta basha abao ora e ministronan di MEP ta renuncia causando un crisis politico.

E motibo oficial tabata un desacoerdo tocante e autoridad pa explota e rikesanan natural den e awanan rond di Aruba. Remarcabel sinembargo tabata e esfera di bon entendimiento cu a keda reina ora e kabinete Martina a cai. Gobierno Central ta declara cu e ta para tras di e lucha di Aruba pa motibo cu e relacionnan existente ta trece mucho problema.

Na e mesun momento Betico Croes ta declara cu e acuerdonan di e prome sesion di e Conferencia di Mesa Rondo no tabata valido mas. Joop den Uyl, e ministro nobo pa asuntonan Antiano, ta bula bay Antias personalmente pa salba e acuerdonan di e prome sesion di e Conferencia di Mesa Rondo pero ta bolbe man bashi. Na su yegada na Schiphol Den Uyl ta declara cu e discusion tocante e independencia di Aruba a bira posibel awor.

Tanto e argumentonan cu gobierno Central y partido MEP a usa pa hustifica e caida di kabinete Martina tabata camuflahe. E motibo real tabata cu MEP y e otro miembronan di coalicion di e otro islanan a yega na e conclusion cu tabata den nan interes comun pa anula e acuerdonan di e prome sesion di e Conferencia di Mesa Rondo. Y nan a hacie na un momento cu Hulanda no por a reclama e islanan di irresponsabilidad politico ya cu e instabilidad politico e momento ey na Hulanda, no tabata mucho mihor. E timing tabata perfecto.

E otro partnernan den coalicion a realisa cu e di dos sesion lo trata e fase final y un posibel independencia indesea pa nan di parti di Hulanda. Y pa MEP esaki a nifica keda den un constelacion Antiano. Na final e strategia di Hulanda a backfire y Betico Croes a demonstra di ta un mihor strategista. el a logra di reclama victoria en bista di un derota inminente. Esaki tabata un episodio decisivo den e lucha pa nos Status Aparte.

A  consecuencia di e anulacion a instala  e Comision Mixto Futuro Antias ariba 14 di januari 1982 y cual a entrega su rapport ariba 25 di november 1982. Esaki a forma e base pa e di dos sesion di e Conferencia di Mesa Rondo na maart 1983 durante cual a accepta un Status Aparte pa Aruba durante un periodo di transicion di 1985 pa 1995. Como condicion Hulanda a exihi cu Aruba lo bira independiente despues di e periodo di transicion. Y e delegacion di Aruba e biaha aki si a call e bluff di Hulanda pa accepta e independencia na 1995. Esaki sinembargo nunca a bira realidad. Ora a yega e momento ni Aruba ni Hulanda a persisti pa Aruba bira independiente na 1995.  Esey ta demonstra cu e opcion di un independencia di Aruba nunca tabata real teniendo cuenta cu e contexto geo-politico existente pero mas bien esaki tabata parti di un negosacion cu tabatin hopi ingredientenan di un wega di poker.

Mario E. Croes.

 

 

- Advertisement -

DUNA COMENTARIO

Please enter your comment!
Please enter your name here