ORANJESTAD (AAN): E siman aki, Cendric van der Linden, boluntario di Cruz Cora, a bishita directora di Biblioteca Nacional Aruba, señora Astrid Britten pa entrega buki di historia di Cruz Cora.
Cendric a entrega dos buki y un moneda special. Ta trata di ‘Here to help: 150 years Netherlands Red Cross’ skirbi pa Margot van Kooten y ‘Hier om te helpen: 150 jaar Nederlandse Rode Kruis’ (400 pag.) skirbi pa e mesun autor hunto cu Ad van Liempt.
E bukinan aki ta conta e historia di 150 aña di historia di e organizacion Cruz cora na Hulanda, for di 1867 te 2017. Tambe ta duna un bista fotografico di diferente momento impactante den historia. Y ademas storia di heroe y victimanan di desgracia. E investigadornan y autornan ta duna un relato extenso di hopi suceso den historia.
Cruz Cora ta e organizacion humanitario conoci rond mundo pa yuda hende den necesidad di cuido inmediatamente. Cendric tambe a entrega un moneda di 5 Florin conmemorativo cu a Cruz Cora a laga diseña den cuadro di e celebracion di e milestone importante aki. Pronto e buki lo ta pa fia na biblioteca.
Cruz Cora na Aruba por conta cu diferente boluntario pa yuda preveni accidente y duna asistencia di prome auxilio. Cruz cora Aruba ta forma parti di un organizacion mundial y ta ofrece diferente curso con pa yuda den emergencia. Pa bira un boluntario mester ta 16 aña bay ariba. Oficina ta situa na Pedro Gallegostraat 14.
