Remitido
Nos por mira claramente cu den Bijbel e tradicion di Israel, cu tabata e prome pueblo escohí di Dios, nan tabata dera semper nan curpa y nunca nan no tabata kima nan curpa morto, mientras cu e otro pueblonan pagano si tabata kima nan curpa morto.
E tradicion di deramento di curpa, ta worde demostra den e Testamento Bieu y tambe den e Testamento Nobo. Nos Senjor Hesu-Cristo mes a worde dera den un graf y e imahen di Cristo resucita, dera y despues E’l a lanta for di morto (Rom. 6: 3-5; 1Cor. 15: 3-4).
P’esey di e manera ey, tur Cristiannan ta prefera e deramento y no e cremacion, pa mantene e manera cu Cristo-Hesus nos Senjor a worde dera, pa despues cu nos curpa worde transforma manera di Cristo-Hesus, den un curpa glorioso, den un curpa resucita (Filip. 3: 21, Luc. 24: 30-40, Huan 20: 19-26).
Nos tur ta Cristiannan yiunan di Dios, ta p’esey nos ta concerni pa haya un bon entierro manera cu mester ta. E curpa di tur ser humano a worde crea pa Dios y Dios a pone Su imahen den nos y Dios kier pa nos worde trata cu respet, pasobra nos ta di dj’E. E Spirito Santo ta move den nos curpa di esnan cu ta kere y ta haci nos curpa un instrumento di honor.
Cristo-Hesus mes a worde dera y E’l a lanta Su mesun curpa for di morto, p’esey tur Cristiannan ta kere cu nan deramento ta un testimonio pa e resureccion cu tin di bini. Mira con e Santonan cu a muri hopi siglonan pasa, nan curpa a keda incorumpi (sin danja). Tur esey ta sosode pasobra nan a biba un bida Cristian y un bida Santo den bista di Dios.
Awor Iglesia mester ta conciente di esaki, ta con Iglesia ta permiti cremacion di curpa y mientras cu Dios kier pa un curpa keda incorumpibel pa motibo di su bida Santo. P’esey cremacion ta bay contra di Dios Su boluntad.
Por ehempel di algun curpa incorumpibel: St. Padre Pío, St. Bernadeta Soubirous, St. Cecilia, St. Juan Bosco, St. Juan Vianney, St. Francisco de Sales, St. Vincent de Paul, St. Papa Píus V, St. Papa Juan XXIII, St. Anna Maria Taigi, St. Agatha y hopi mas. Cremacion no ta bini di Dios, pero cremacion ta bini di diferente pueblonan pagano y di diferente paisnan cu tin otro creencianan oculto. Hudiunan y Islamnan, nan no ta permiti cremacion di curpa den nan país.
Tambe tin diferente Iglesianan y religionnan na mundo ta descurasha cremacion di curpa. Nos mester kere, cu nos curpa ta Santo crea pa Dios y cu nos curpa mester worde trata cu honor y cu respet y nos mester sinti, cu cremacion ta contra di e resureccion di nos curpa.
Den Bijbel ta papia, cu nos curpa lo bira stof manera cu mester ta durante tempo, pero Bijbel no ta papia, cu curpa ta bira shinishi pa medio di kimamento di curpa. Ta con un famia lo sinti, cu nan ser stima a pasa pa medio di candela y a bira shinishi? Ta con un famia ta bay celebra dia di tur defuntonan y mientras cu no tin curpa, pero solamente shinishi tin door di candela? Mi ta spera cu e consehonan aki por yuda hopi hende bira conciente, cu cremacion di curpa NO ta bini di Dios.
Un Cristian Católico.
(Nomber conoci
pa Redaccion).
