Remitido
Kico ta e nificacion di e pika di fornicacion? Den e di 9 Mandamento di Dios ta bisa, pa no comete e pika di fornicacion. E pika di fornicacion ta e relacion sexual prohibi pa Dios y ta condena hende pa fierno y esaki ta esnan cu ta den e libertinahe sexual, parehanan cu ta biba companja sin casa pa Dios den e Sacramento di Matrimonio, esnan cu ta haci prostitucion, mamanan y tatanan soltero cu ta lanta famía den nan fornicacion sin casa pa Dios y esnan cu ta casa pa raad so.
Den Bijbel San Pablo ta adverti, 1 Corintionan 6: 18-20; “Huy for di e relacion sexual prohibi, cualkier otro pika cu hende ta haci, ta for di curpa, ma esun cu haci fornicacion ta comete pika contra di su mesun curpa. O boso no sabi anto, cu boso curpanan ta tempel di Spirito Santo cu ta den boso, cua boso a haja di Dios y cu boso no ta pertenece na boso mes?
Pasobra boso a worde cumpra cu un prijs hopi caro, pues glorifica Dios anto den boso curpa, cu ta di Dios.” Den e Palabra di Dios aki, na tur esnan cu ta haci e libertinahe sexual cu ta e fornicacion, nan lo no drenta den e Reino di Dios despues di morto.
Den Bijbel Revelacion di Huan 21: 7-8 ta bisa: “ Esun cu triunfa lo hereda tur cos y lo Mi ta un Dios p’e y lo e ta un yiu pa Mi. Ma e cobardenan y esnan cu no ta kere y e abominabelnan y e matadornan y e fornicadornan y e hacido di bruhanan y e adorador di diosnan falso y e gañadonan, nan parti lo ta den tanki cu ta cende cu candela y zwafel, cu ta e di dos morto.” Den Bijbel Hebreonan 13: 4 ta bisa: “Laga bida di casa ser respeta pa tur y cana sin mancha, ma e fornicadornan y e kibradornan di matrimonio, Dios lo husga nan.” Pa un pareha por haci e relacion sexual pa lanta famía, nan mester casa pa Dios den e Sacramento di Matrimonio den Misa, pa medio di un Sacerdote cu ta representa Dios como minister spiritual.
Den Bijbel Marco 10: 6-9 ta bisa: “ Ma for di principio di mundo Dios a traha homber y muher. Pésey un homber lo bandona su tata y su mama y lo e uni cu su muher. Y e dosnan aki lo bira un curpa, asina nan lo no ta dos mas, ma un solo curpa. Loke cu Dios ta uni, hende no ta permiti di separá.” Den e palabranan di Dios aki, e pareha ta casa pa Dios den e Sacramento di Matrimonio den misa, nan lo bira un solo curpa den bista di Dios y na unda nan por tin relacion sexual pa lanta famía.
Tambe den e Evangelio aki, Dios no ta reconoce divorcio, pasobra loke cu Dios a uni den e Sacramento di matrimonio, e pareha ta keda casa te na morto y no ta permiti pa hende divorciá. Den Bijbel Marco 10: 11-12; Hesus ta bisa:”Ken cu bandona su muher y e casa cu otro muher, esey ta comete adulterio contra di su muher. Y si un muher bandona su homber y e casa cu un otro homber, e ta comete adulterio.”
Den e Evangelio aki, si e homber divorcia di su senjora y e casa pa raad cu un otro muher, e ta comete e pika di adulterio contra di su mes senjora cu Dios a uni nan. Y si e muher divorcia di su esposo y e casa pa raad cu un otro homber, e ta comete e pika di adulterio contra di su mes esposo cu Dios a uni nan. Den e Sacramento di Matrimonio di Dios, maske cu e pareha a separá of a divorcia, nan ta keda casa pa Dios te na morto. Pésey nan mester purba uni atrobe cu otro of nan mester keda biba nan so den castidad pa nan por ta salbá y pa nan por biba un bida Cristian dunando nan yiunan un bon ehempel.
Den Bijbel 1 Tessalonicensenan 4: 3-5 ta bisa: “E boluntad di Dios ta, pa boso bira santonan y huy boso di fornicacion. Cu cada un di boso comportá cu su mes senjora den santidad y respet. No laga boso worde hiba pa e mal pasionnan, manera tin hende ta haci cu no conoce Dios.”
Un mensahero di Dios.
(Nomber conoci
pa Redaccion).
