ORANJESTAD(AAN): Durante oranan di marduga cu patruya di Santa Cruz tabata riba caya, entre 02:40or te cu 02:50 or e patruya a haya holo di marihuana na altura di Tamarijn.
E holo di marihuana tabata bin for di un auto Honda color blauw A-6030.
Durante control e polisnan a haya holo mas fuerte y e agentenan a wak dos homber den e vehiculo.
D haya sa nan J.M.K. y D.A.R.P . Nan wowo tabata cora.
Relaciona cu esaki polisnan a atende e dos hombernan debido y cu permiso di e chofer e auto a wordo controla. Den e vehiculo a wordo haya un pochi chikito di glas cu yerba parecido na marihuana.
E pochi a wordo confisca y destrui.
Den otro caso, patruya di Oranjestad diamars mainta durante cu nan tabata patruya, pasando den Rumba straat na altura di “ministerio publico” nan a wak un auto shinishi marca Toyota modelo Tercel cu plachi number A-63300 .
E porta banda drechi dilanti tabata habri y e vehiculo tabata para cu un parti riba caminda.
Relaciona cu locual e patruya a constata nan a bay controla e vehiculo.
Den e auto polis a haya un homber morto na soño y den su man e tabatin teni un cigaria di marihuana.
Polis a coge e cigaria di marihuana for di su man y a lanta e homber for di soño.
A puntre su nomber y su inicialnan ta M.J.D.G..
El a declara di tabata sperando riba su amigo cu a bay busca formulario na Ministerio Publico y cu e tabata sinti cansa y el a pega soño.
Polisnan a atende e homber aki debido tocante e cigaria di marihuana cu a haya den su man y e homber a declara cu e cigaria di marihuana ta pa su propio uso. Polis a confisca e cigaria marihuana na e personal di UGC (“Unit Georganiseerde Criminaliteit”).
