ORANJESTAD (AAN): E torneo di golf mas popular di nos isla a desvela su mes riba e golf course Robert Trent Jones II, diasabra 7 di april, y a termina cu Julian Tucker y Maurice v/d Linden na cabes, Axl Ismael y Alexandra Brown na di segundo lugar, y VJ Luidens y Gerald Sarmiento na di tercer lugar.
E torneo anual, organiza akinan pa di diestres aña consecutivo, ta un fundraiser cu ta sostene causnan comunitario. E ta worde brinda pa Arion Wine Company NV hunto cu Wente Vineyards di California y Papiamento Restaurant. Pa e torneo a inscribi 126 hungador, pa un formato di encuentro divertido di dos persona. E fondonan recauda ta destina pa FHMDD, Fundacion pa Hende Muher Den Dificultad. FHMDD tabata representa pa e presidente di e hunta, Suzette Kock, y pa miembro di e hunta, Sigrid Torre, na e cocktail party diabierna anochi na Papiamento Restaurant.
Den su discurso dirigi na e hungadornan di golf y patronicadornan, Kock a splica cu FHMDD ta duna apoyo y guia na victimanan di violencia domestico y ta yuda cu concientisacion di violencia domestico riba nos isla, usando tur metodonan den disposicion di e fundacion. E obhetivo, el a afirma, tabata pa empodera hende muher pa asina nan y nan famia por ta menos vulnerabel den futuro. E torneo cu a cuminsa 12:30 p.m. en punto, a worde supervisa personalmente pa e hungador di golf profesional James Kiley y apoya pa Govert van der Hout di Arion Wine Company NV y Eric Wente, presidente di e hunto di directiva di Wente Vineyard, kende a gradici cada hungador pa nan participacion.
Despues di a disfruta di un atardi excelente riba e golf course, e participantenan a aglomera rond di e pool na e clubhouse na bahada di solo, pa disfruta di sopinan delicioso y sandwichnan cu a worde provee door di Tierra del Sol, acompaña pa biñanan di Wente Vineyard, sigui pa un ceremonia di premiacion, presentacion di premionan, y oportunidadnan pa saca potret, cu a conclui e dia yena di accion.
E dia tabata aun mas emocionante ora Patrick Melchiors, representando Aruba Tourism Authority a entrega Eric Wente un Certificado di Distincion pa bishita Aruba pa 15 aña consecutivo. “Nos ta aprecia bo aopoyo na e isla y su hendenan, y pa bo dedicacion continuo na recaudacion di fondo pa causanan social”, el a agrega.
Como ta costumber, tur premio di e torneo a worde patrocina pa Wente Vineyards y nan tabata inclui algun di e mihor biñanan di e bodega, den boter grandi, como tambe un biahe pa e bodega na California pa e ganadornan cu a sali na prome lugar pa nan por hunga riba e golf course diseña pa Greg Norman, pa come na e famoso restaurant y mas cu claro pa bishita e facilidad di produccion.
E ceremonia di premiacion a reconoce tambe e tironan mas cerca di e pin, incluyendo John Cathlin na # 3, Calvin Maduro na # 7, Jose Luis Cámara na # 13, Jacqui Ingrassia na # 15 y Carisia Bernabeka na # 17. Un premio adicional a worde otorga na e hungador di golf Sven Schneider, ganador di e quiz di biña cu a mustra su conocimento di e marca Wente. el a worde recompensa cu un boter di 3 liter di Murrieta su Well Estate Vineyard, The Spur, un mezcla cora di e tiponan di druif clasico Bordeaux. Murrieta Well Estate Vineyard ta propiedad di e Wente Family Estates cu ta mucho mas grandi, cu a incorpora nan den nan marca di biña luhoso.
Tur hungador a expresa nan satisfaccion completo cu e organizacion detaya di e torneo y tur e tokenan special; palabranan di elogio a bay pa Papiamento Restaurant pa nan sandwichnan “to-go” creativo cu a worde sirbi durante e dia.
“Nos ta organiza e torneo otro aña atrobe”, van der Hout a declara, “Eric Wente ya a anuncia cu e lo bolbe pa e di 14 torneo consecutivo”, cu tabata ensera planeamento minucioso di parti di Arion Wine Company, encabesa pa Odille Lacle.
Riba potret por aprecia, Eric Wente, Govert van der Hout, James Kiley na e ceremonia di premiacion cu e feliz ganadornan.
