Remitido
Den e articulo aki ta referi exclusivamente na primanan pa sostene e seguronan general di malesa (AZV) y di pensioen di biehez (AOV) di Aruba.
Con e situacion ta actualmente mi ta laga pa Gobierno, AZV y SVb mes splica detayadamente si ta necesario. E articulo aki ke boga pa un solucion no politico pero husto pa cubri gastonan di AZV y AOV.
Ora tur Gobierno ta boga , cu boca pero no cu accion, pa e personanan cu ta gasta mas aporta tambe mas na gastonan di Aruba, e articulo aki ta exigi pa gastonan di AZV y AOV worde cubri pa un impuesto unico (BBO-nobo) riba benta c.q. omzet di negoshinan na Aruba ( na lugar di e actual BBO “politiek verziekt” ).
Pakico? Pasobra : 1. nos leynan di AZV y AOV ta conta pa tur ripiti tur hende cu ta inscibi (na Censo) na Aruba ; pues hendenan cu a/ta biba na Aruba. 2. Tur hende cu a/ta biba na Aruba tin cu gasta pa nan por biba na Aruba cumprando cos di moda cu tur hende lo paga pa e seguronan cu nan mes a/ta bay gosa di dje. 3. Bishitantenan, turistanan legal y ilegal, tambe lo aporta na AZV y AOV cumprando cos na Aruba y asina tur habitante di Aruba , no e sector turistico so , lo gosa merecidamente di e turismo di Aruba.
E reforma mester encera cu : loke cobra na e BBO-nobo ta bay completamente pa AZV y Fondo di AOV na SVB ; Gobierno teniendo cuenta cu e gastonan ta dicidi ki percentage di e BBO-nobo ta bay pa AZV y ki percentage ta bay pa fondo di AOV na SVb ; Gobierno ta encarga e combinacion AZV/SVb cu e control exclusivo riba e benta c.q. omzet di negoshinan segun ley di Aruba ; Gobierno y/of e combinacion AZV/SVb ta encarga un instancia independiente (nombra pa Gobierno/AZV/SVb) cu control estricto , permanente y al dia (no te despues di relato anual) di gastonan pa mantene gastonan di AZV y AOV manehabel.
Kico por ser considera e bentahanan?
Pa Gobierno: Menos trabao , gastonan ta baha hopi pasobra Gobierno no lo bay tin cu administra ni controla ; entradanan di BBO-nobo negoshinan lo por deposita riba un cuenta special di AZV/SVb-aov y no den caha di Gobierno.
Pa doñonan di trabao : menos trabao y gastonan pasobra no mester ni administra ni cobra ni paga primanan di AZV y AOV pa/na Gobierno. Negoshinan lo deposita e entrada di BBO-nobo riba un cuenta special di AZV/SVb-aov
Pa trahadornan : mas entrada pasobra ningun doño di trabao lo bay kita primanan mas di nan salario y nan por gasta nan salario manera na ta desea.
Pa AZV y SVb-aov : mas trabao pero cu control riba nan entrada y cu cobramento di BBO-nobo den nan mesun man y no den man di Gobierno.
Pa tur habitante di Aruba : e entradanan di BBO-nobo no ta bay mas den caha di Gobierno pa worde usa pa otro cos.
- Arends.
