ORANJESTAD(AAN): — Como Bucuti & Tara Beach Resort, tambe tin un rol importante den loke ta sterilisacion di cacho. Nan a pone un fondo. Tisa La Sorte a splica cu e proyecto aki no a para. Ta di tres aña cu esaki ta andando y e aña aki e ta mas agresivo ainda.
Nan ta paga pa henter e gasto di sterilisacion pa e fundacionnan di rescate y a paga un gran parti di e costo pa individualnan cu ta adopta un cacho of pushi. El a bira un programa agresivo te awo. Desde comienso di e programa tin mas cu 7000 pushi y cacho cu a yuda sterilisa.
Esey ta un progreso grandi y a gasta mas cu 700 mil en total. A haya un bon donacion di TPF y di ATA y tambe algun donacion mas chikito. Dimes Bucuti & Tara ta contribui grandemente. Sterilisacion ta e unico solucion cu tin a largo plazo, pero e ta tuma tempo.
E ta haci cu ta evita pa mas cacho y pushi nace y door di esey cu tin un poblacion grandi den futuro. Pero ainda tin esunnan cu ta existi actualmente pa pak aan, pa por haya un hogar y salba nan. Ta un trabao grandi.
Mester ayudo di tur hende. Mester di e fundacionnan cu ta trahando duro, tur voluntario, mester companianan manera Bucuti cu ta duna placa pa e solucion y tambe henter e poblacion pa compronde cu sterilisacion ta solucion pa e problema.
Mentalidad ta cambiando
Door di e programa a ripara cu no ta necesariamente mentalidad mester cambia. Parce cu hendenan ta compronde cu sterilisacion ta e solucion. Djis cu nan ta dispuesto pa gasta un cierto suma so riba esey.
E drempel ta e gasto. Pesey e programa di Bucuti ta yuda pasobra ta yuda baha e gasto pa e hende cu nan lo haci’e. Sterilisacion ta un inversion cu tin cu haci pasobra e ta e unico solucion cu tin pa nos comunidad.
