Durante proyecto “Ban Cultiva”
ORANJESTAD (AAN) – Dr. Deyanira Maduro, consehero di Minister di Salubridad Publico, tambe a hiba palabra den conferencia di prensa, Diahuebs mainta, relaciona cu e proyecto “Ban Cultiva”.
Salud Publico tambe ta forma parti di e proyecto aki, y Ministerio di Salud ta organiza e parti di actividad fisico, IBISA, alimentacion cu tambe ta sumamente importante.
E parti di alimentacion no ta solamente teoria pero tambe lo tin tayer di trabao pa hacie na un forma interactivo.
Drs. Deyanira Maduro a menciona cu na Aruba e problema ta mas tanto sobre alimentacion, y si nos hendenan ta siña con pa lesa e label, kico e producto mes ta, si ta den bo patronchi di cuminda, nan lo wak alimentacion for di otro punto di bista.
Dr. Maduro a indica cu estudionan y investigacion cu a wordo haci cu ta indica cu nos populacion tin e tendencia di no ta activo, vooral den e rango di 35-45 aña.
E ta mira e necesidad pa motiva nos comunidad pa ta mas activo y come mas conciente. A base di esaki e programa di alimentacion ta bay guia e hendenan den forma di ta mas conciente ora di haci compra di alimentonan cu por fit tur cartera. Durante e ocho edicionnan esaki lo wordo duna pa nutricionistanan di IBISA, y e parti di actividad fisico, cu tambe ta hopi importante, ta bay un seccion den cual ta bay tin actividad fisico pa famia, yiu cu mayornan.
E dama a menciona cu den e dianan nos dilanti lo duna mas informacion na prensa.
