Home Social Ciudadanonan di Aruba tin deber pa laga nan yiunan bay scol y...

Ciudadanonan di Aruba tin deber pa laga nan yiunan bay scol y pa no usa violencia contra pareha y yiunan

124
0
SHARE
????????????????????????????????????
- Advertisement -

Veiligheidshuis no ta bay soluciona tur problema social cu tin na Aruba:

ORANJESTAD   (AAN):  Procurador-General di Aruba Alexander van Dam a tene un speech awe na occasion di apertura festive di Veiligheidshuis di Aruba. Minister di Husticia Andin Bikker y projectleider di Veiligheidshuis Bernice Schulte tambe a speech.

PG Van Dam a cuminza na gradici FDA y Parlamento di Aruba. Ta danki na e fondonan cu nan a pone disponible cu e dia aki por a keda realiza.

Van Dam a bisa: “Tempo mi a bin Aruba dos aña pasa como Procurador-General, e realizacion di un Veiligheidshuis tabata riba mi to do-list. Na Ministerio Publico di Hulanda mi tabata responsable pa e desaroyo di e Veiligheidshuisnan aya. E desaroyo aki tabata encera cu e Veiligheidshuisnan lo mester cuminza dirigi nan mes riba tratamiento di casonan complejo”.

Cu complejo e PG kier meen cu e tipo di casonan aki ta complica tanto riba tereno di cuido como di husticia.

El a sigui bisa: “Na Aruba tambe nos ta mirando esey mas y mas, cu casonan ta bira mas complejo, cu tanto e necesidad pa solucionnan social como pa programanan preventivo, den cual Polis y Ministerio Publico tin un rol grandi”.

Veiligheidshuis no tin un tarea facil, e PG a constata: “Si mi wak cierto casonan cu nos ta trata na Ministerio Publico, ta resulta hopi biaha cu e casonan aki tin problemanan social na e base. Y mi ponencia ta cu si bo traha na e problemanan aki, lo bo automaticamente tin menos criminalidad. Mi ta tuma como ehempel cu si bo hinca un recidivista adicto cu constantemente ta bin den contacto cu Polis den un centro di rehabilitacion y esey logra, e ta bay stop di comete delitonan. Y si muchanan bay scol, envez di cana riba caya, nan por siña un ofishi pa nan gana nan cen den futuro”.

E morto tragico di e dos muchanan aña pasa, a accelera e proceso pa lanta Veiligheidshuis. E partnernan den e cadena di cuido y di husticia a enfatiza y sostene e importancia y necesidad di e Veiligheidshuis den nan presentacionnan na Conseho di Minister.

Segun e PG den su speech: “Crimennan grave, manera e morto di e dos criaturanan, mester wordo preveni y cu ta vooral e partnernan social cu awor tin cu sali pa dilanti. Ministerio Publico ta semper e ultimum remedium”. E ta hopi contento cu Conseho di Minister a saca un MB e aña aki pa yega efectivamente na lanta e Veiligheidshuis. Den e MB a dicidi tambe pa lanta un grupo di trabao hoogambtelijk pa monitor e Veiligheidshuis. E werkgroep aki lo relata directamente na Premier di Aruba, cu ta mustra tambe e importancia cu Premier ta duna na e iniciativa aki.

Riba tereno social tin hopi trabao, por ehempel, riba tereno di cuido di adiccion, cu mester wordo reforza, y na enforza leerplicht, cu ta asina importante pa muchanan, y na bringa violencia relacional.

PG Van Dam: “Porfin nos tin un lugar unda e cadena di cuido y husticia ta bin hunto. Pero mas cu claro Veiligheidshuis no ta bay soluciona tur problema social cu tin na Aruba. Ciudadanonan di Aruba tambe tin nan debernan. E deber pa laga nan yiunan bay scol y e deber pa no usa violencia contra nan pareha y nan yiunan”.

El a haci un apelacion riba ministernan di Asuntonan Social y Enseñanza pa traha conhuntamente na un ambiente safe pa muchanan y famianan na Aruba y a sigui bisa: “Mi a lesa den corant cu Hulanda y Aruba, Curacao, Sint Maarten y islanan BES a palabra pa traha hunto na cumpli cu e obligacionnan mara na e Tratado Internacional di Derechonan di Mucha”.

Tur parti a firma pa tin cla prome cu 15 di augustus venidero, un Memorandum of Understanding pa concretiza nan cooperacion. Riba tereno di derechonan di mucha tin trabao den tur parti di Reino, asina varios investigacion di UNICEF a mustra tambe.

Algun di e puntonan importante di e acercamento conhunto aki ta pa preveni y bringa maltrato, promove educacion, profesionalizacion di ayudo na famianan, stimulacion di participacion di muchanan y hobennan y mas atencion pa muchanan vulnerable, particularmente yiunan di imigrantenan.

Cada pais lo traha plannan di accion y cada aña lo presenta con e progreso ta bay den un Interlandelijke Taskforce Kinderrechten Conferentie. Pa Aruba minister di Asuntonan Social Glenbert Croes a firma. E desaroyo aki ta pas full den e metanan di Veiligheidshuis pa percura pa un Aruba mas safe.

 

 

 

 

 

- Advertisement -

DUNA COMENTARIO

Please enter your comment!
Please enter your name here