Home Editorial Mester proteha Arubianonan y restaurantnan estableci caba

Mester proteha Arubianonan y restaurantnan estableci caba

579
0
SHARE
- Advertisement -

One happy island of one restaurant island?

Tin un desaroyo hopi preocupante riba nos isla. Restaurantnan ta lanta manera paddelstoel y esaki ta forma un peliger pa tur e restaurantnan di nos yiunan di tera y e restaurantnan cu tey caba.

Aruba ta conoci pa “One happy island” pero manera e desaroyo ta bayendo ta parce cu Aruba ta birando “One restaurant island”. Unda cu bo core bo ta mira cu tin un restaurant, sea chikito of grandi.

Nos isla tin mucho hopi restaurant caba. Unda cu bo bira bo ta mira restaurantnan di hamburger, sushi, pizza, arepa, barbeque y tanto otro. Tin un situacion awor aki cu “Goliath ta comiendo David”. Envez di concentra riba calidad di servicio, caminda nos ta enfoca riba restaurantnan di clase, awor tin competencia inhusto entre restaurantnan pasobra tin asina hopi.

Ultimamente hopi videonan a sali riba “you tube” caminda ta mira con extranheronan ta manipula cu cuminda. Esaki ta un asunto hopi serio y hopi hende tin miedo di bay come den cierto restaurantnan pasobra nan no ta confia cu e cuminda cu nan ta haya ta di calidad. Ta un secreto publico cu tin kehonan haci pa cosnan straño cu a haya den cuminda.

Por ripara cu nos Gobierno a cuminsa tene controlnan riguroso y impone medidanan fuerte contra esnan cu no ta cumpli cu e regla di hygiene y sanidad cu ta condicionnan principal pone den nan permiso pa cu restaurant.

Hopi biaha ta constata falta di hygiene y sanidad pasobra esnan extranhero cu ta bin establece y ta habri restaurant, ta bin cu competencia inhusto pa kita clientenan for di otro restaurantnan existente y di calidad cu tin riba nos isla y nan no ta mantene nan mes na reglanan estableci.

Gobierno mester para firme y bisa NO na dunamento di permiso na extranhero cu kier bin establece na Aruba pa bin cu mas restaurant.

E Gobierno actual, cu ta goza cu e sosten mayoritario di Aruba, mester proteha nos Arubianonan cu tin restaurant y e restaurantnan existente.

No por permiti cu esnan di extranheria ta bin pa forma competencia inhusto y caba cu esnan ya caba estableci y cu ta di calidad.

Aruba tin mucho hopi restaurantnan y awor Gobierno mester enfoca ariba CALIDAD y no CANTIDAD. E restaurantnan mester garantiza cu tur cliente ta haya bon servicio y cuminda di calidad. Regularmente mester tene controlnan pa garantiza cu restaurantnan ta cumpli cu reglanan di higiena y sanidad.

E restaurantnan cu no ta cumpli, mester haya sancionnan severo pasobra no por permiti cu door di negligencia ta pone bida di hende na peliger.  Mester evita cueste loke cueste cu e calidad di nos restaurantnan ta baha pasobra esey lo perhudica nos industria turistico.

 

- Advertisement -

DUNA COMENTARIO

Please enter your comment!
Please enter your name here