Ta pidi Huez awor nombra miembronan nobo
ORANJESTAD (AAN): Ta for di final di aña pasa caba, e trahadornan di Parke Nacional Arikok a bin ta vocifera nan disgusto den prensa riba e forma con e Parke ta wordo dirigi. Tin biaha e trahadornan tabata haya e ‘sentimento’ cu e directiva di Parke no tin interes at all pa proteha naturaleza, y ta mas bien haci otro cos. Tambe a critica hopi cu a pone hende traha den Parke, siendo nan no sa nada di naturaleza.
Aña a habri y tabatin diferente walk-outs, unda cu porfin e trahadornan a haya atencion di Ministro. Nan a mustra con varios punto di maneho ta bayendo malo, y nan mes ta sufriendo, e.o. cu nan uniform mes ta tur gasta, borchinan di indicacion den Parke ta tur na werki, y mucho mas.
E situacion a escala riba Dialuna, ora cu na un forma inespera, henter e Directiva di Parke Nacional Arikok a entrega nan retiro. Nan a haci esey, pasobra nan ta sinti cu tin disputa riba e maneho cu e Directiva ta hiba, y e maneho cu Gobierno nobo kier hiba.
Despues di nan retiro, e directiva di Aruba Birdlife Conservation (ABC) cu tin Greg Peterson como secretario, a manda un carta pa Huez di Corte di Prome Instancia, cu copia pa e.o. Gobernador, Ministro, Empleadonan, NGO’s, y Parlamento.
ABC ta haci suplica na Huez, segun articulonan di Landsverordening op de Stichtingen (L.O.S.), y tambe statutonan di Parke FPNA, pa start cu e proceso pa nombra miembronan nobo di e directiva di Parke. Aki ta pensando di inclui miembronan di diferente NGO’s cu tey pa proteccion di medio ambiente.
