Remitido
Cu hopi buya político ta anuncia den prensa cu a entrega un projecto di ley pa bin cu control financiero di partidonan político. Bunita!
Si Parlamento di Aruba tin un sistema electrónico pa facilita trabao di Parlamento , pakico pueblo no por mira/lesa kico e ley ta contene? Ta asina difícil pa pone e tratamento (riba papel/schriftelijke behandeling) completo di e ley riba internet/paginaweb di Parlamento pa pueblo ta informa kico ta e contenido, kico ta e consehonan y kico ta comentarionan riba e ley aki , PROME CU PARLAMENTARIONAN DICIDI?
E lema popular no ta “SIN MIEDO” of ta “MIEDO TIN” pa pueblo haya sa di e contenido, di e consehonan, di e comentarionan di instancianan oficial y no-oficial PROME cu Parlamento dicidi?
E ley ta laga buraconan habri pa podernan scur internacional y local mete/influencia resultado di elección?
E ley tin sanccionan pa aplica contra politiconan, candidatonan y financiadornan ora nan no cumpli cu e ley?
E ley ta indica cua instancia, LIBER DI INFLUECIA POLITICO, ta keda encarga cu ehecucion di e ley?
Asina tin hopi pregunta cu pueblo ke sa si a tene cuenta cu nan den e ley pa eleccionnan ta limpi y sin influencia scur local y internacional.
Ban mira Parlamentarionan “nobo/ moderno” kibra cu secrecía y aplica loke boso ta predica pa loke ta “transparencia y participacion”.
